英美股市周一假期，淡友放軟手腳。港股上午受和黃（013）可能結束英國3G業務傳聞拖累跌逾百點，在12000水平徘徊，午後好友推高滙控（005），帶動大市倒升81點，收報12198，成交123.85億元。滙控全日升1.7%至117.50元，成交21.6億元。
賣地後新盤銷情放緩，投資者對地產股轉趨審慎。樓房買賣乃長線投資，交易成本又較高昂，點可以要求樓市好似股市咁，對好消息作出快速反應？當賣地繼續有好消息，麫粉貴過麫包成為趨勢後，有意置業者就會心急入市，在求過於供的情況下，樓市又豈有不升之理，但地價高企肯定增加地產商投資風險。
蒙牛（2319）正式招股，據聞配售方面的初步反應唔錯，是近期比較熱鬧的新股，招股價範圍由原來的2.69-3.72元，臨時調高至3.125－3.925元。黑客話，雖然國內要搞宏調，但仍有許多銀行同保險公司要來港上市集資，所以中央唔會太重手，至今未再有新的宏調措施推出，而內地高官則強調經濟可以軟着陸，大派定心丸，估計新股熱潮，短期內可支持國企造好。不過，荷銀就認真唔合作，出報告叫客趁高出貨，講正阿虎的心底話。
星晨（542）噚日停牌，解釋成交大幅增加的原因。此股平時冇乜成交，但上周四有4500萬股上板，每股作價6仙，金額270萬元；上周五則有5046萬股上板，每股作價又係6仙，金額303萬元。聽講係主要股東減持。
阿虎