昨日講FrederickForsyth本小說，書名叫做《TheFistofGod》，一九九四年出版，內容如有雷同，實屬巧合，講嘅就係一九九○年八月五日侯賽因入侵科威特，美英聯軍在一九九一年一月十七日攻打伊拉克前夕嘅間諜戰，作者係英國人，小說中嘅英雄亦係英國人，打贏仗全靠英國人！如果作者係美國人，大英雄當然就係美國戰士啦。
昨日講每個人都有弱點，科西夫本小說好仔細描寫以色列特務點樣去搵當事人弱點。第一、佢哋知道維也納一間銀行用手抄數目入帳，唔用電腦，先進「黑客」技術無所施其技。第二、銀行經理係大悶蛋，冇弱點可以利用。上頭話明唔准用硬工夫，以免驚動奧地利警方，以色列特務卒之諗到向銀行經理秘書埋手。
秘書與經理冇婚外情，秘書樣子麻麻，薪水唔高，只堪自己養自己。特務潛入佢家中搜查，搵唔到任何有用資料，只見滿屋都係莫扎特歌劇海報、唱碟，知道秘書係莫扎特歌劇迷。於是派出一位英俊小生，冒認約旦皇室子弟到維也納讀音樂嘅學生，在街上碰上秘書，借故問歌劇院在哪裏，猛講莫扎特。秘書以為碰上同路知音人，俾特務釣咗上手。原來喺維也納睇歌劇，入場票好貴，秘書負擔唔起，終於抵唔住誘惑，陪約旦王子去睇莫扎特歌劇，一睇就不能自拔，於是俾特務搞掂咗，床上盡爆銀行經理內幕。以色列特務搵到秘書嘅弱點（太過鍾意莫扎特），乘虛而入，後來就攞齊晒料，大功告成，秘書重懵然不知。
故事嘅教訓係普通平民面對有組織、有資源、有經驗嘅對手，可能死咗都唔知發生乜嘢事。