李鵬飛午夜凶鈴事件，中方忍足兩日，由一名自稱叫「成綬三」嘅中年男子出頭，透過喉舌報刊，再加「記者會」，向飛哥展開反擊，話問候妻女，係「協助」佢「喚起記憶」，極盡搞笑之至。
姓「成」定姓「陳」，無關重要，飛哥普通話唔好，六十幾歲人聽電話，呢位成某，自稱係李鵬飛「老朋友」，如果屬實，一個「老朋友」嘅聲線，點會聽唔出？老友約局開枱，兄弟急Call入馬場，把聲一聽就知係邊個，一輪三字經，笑住衝口而出，互相問候令壽堂之後，跟住再開門見山講內容，呢啲就係香港人親切嘅老朋友手機溝通方式！
𠵱家呢個成前副港澳辦主任就唔係，同人十幾年冇見，失驚無神三更半夜打電話去人屋企，一開口就講人個老婆同女，都幾十歲人，呢啲唔止係觸犯我中華民族嘅儒家禮節，不止「唐突」，簡直「核突」。若然真係老朋友，眉精目企嘅飛哥點會唔一聽就嗌得出名？一個前度京官，曾經介入過中港過渡事務，同飛哥喺官場相識，跟住「完成歷史任務」，閃身隱形，十幾年之後，飛哥做咗《風波裡的茶杯》，佢就走落嚟香港，話要同飛哥「敍舊」，一「問候」完老婆仔女，即時轉入正題話想傾吓人哋嘅節目，飛哥喺政壇打滾三十年，呢亭電話，係乜嘢意思，唔通飛哥係白癡？
政壇無老友，呢一樣係全世界嘅行規。前新華社社長許家屯喺香港嗰陣，夠一樣夜夜笙歌，政壇商場，呼朋結黨，今時今日，佢老人家已經去咗美國「退休」，譚惠珠、梁振英、朗尼．陳加埋統戰女部長劉延東好唔好示範吓畀全港六百萬市民睇吓，乜嘢叫做友情，不如齊齊打個長途電話畀呢位香港親中愛國人士嘅共同老友，為幫助佢「喚醒記憶」，問候完佢老婆，再問候佢個女，跟住就「六四」問題，討論吓佢對呢件事
老朋友問候？咪住，唔該彈開少少。身為前國家級官員，呢個成綬三「退休」之後重編埋中英文辭典㖭，咁佢老人家知唔知英文字Privacy係點解？西方社交禮儀所講嘅Appropriateness係乜嘢意思，或者中文嘅「瓜田李下」點解，定係佢心想Friendship呢個字，喺中國，好似「友誼商店」一樣，只不過係一種你有貨賣，我睇啱就買嘅交易？
飛哥事件最大嘅啟示，就係嘢可以亂食，老友唔可以亂認，特別係北面嘅人，佢叫你一聲「老朋友」，你就好小心啲，分分鐘重險過光明正大稱呼媽田做「漢奸」喎。
至於呢位成生，希望佢經一塹，長一智，打電話去香港，一開口咪講人老婆，因為共產黨以前俾人「誤解」過專門「共產共妻」。肥彭打電話嚟問候李柱銘，問起佢太太同公子嘅安危，冇人會當肥彭係恐嚇，點解全世界人問候都冇事，獨係一位姓成嘅共產黨員一出聲就咁大鑊？呢個問題，真係好不幸囉，睇嚟胡溫都要由「以家人為本」嘅角度，喺黨內展開一場辯論嘞。
傳真︰2623-9278
電郵︰