巴西球星李華度嘅經理人艾林大鬧些路迪領隊奧尼爾。事緣佢話奧尼爾竟然要三十二歲嘅李華度隨些路迪到美國友賽試腳，之後先睇吓簽唔簽佢。
艾林好㷫咁話：「些路迪畀過三封fax我，頭兩封都好有誠意咁話希望李華度加盟，重開出埋條件。不過，第三封就竟然話要佢跟隊波到美國踢友賽試腳！奧尼爾竟然敢作出咁無理嘅要求，絕對係對李華度同埋足球嘅侮辱！」
「以李華度嘅級數同埋經驗，只要接受身體檢查，證明佢弗就得啦！其實，李華度一早立定主意加盟些路迪，𠵱家奧尼爾咁做，佢立即改變主意，唔會去些路迪。」
我求大俠覺得如果李華度真係好似佢經理人艾林所講咁弗同咁勁，去試腳展身手又何妨呢？而且，李華度喺今年二月後就再冇比賽，奧尼爾咁做都係保障球隊利益啫！
過往喺季後賽威到盡嘅溜馬老將米拿，喺上場對住風格同佢有九成相似嘅「排骨仔」咸姆頓，就真係毫無還擊之力。不但俾佢射入咗三十三分，最慘係米拿自己射波完全失準，連往常fake起對手之後博罰球嘅食胡招數都行唔通，有一球重俾球證話佢伸隻腳出嚟「戟人」，吹埋佢進攻犯規，真係黑氣蓋頂。
中超每輪賽事完畢後都有極多爭論之聲，好似日前上海打吡戰，又係球證臨完場前一分鐘判申花獲十二碼，搞到國際門將江津罷踢，擾攘成十分鐘，最後各一言和；中圈再開波十幾秒就完場，難怪又有球迷發火衝入場。最慘係江津，佢罷踢好大機會俾中國足協重罰，球隊失分之餘兼有球員面臨停賽，真慘！
AC米蘭前鋒恩沙基未被召入意大利歐國盃決賽周大軍後，近日寄情獵豔，被意大利傳媒拍到佢喺博洛尼亞度假時同一位聲譽麻麻嘅三級豔星把臂同遊。恩沙基獵豔並唔係新聞，之但係佢以前搭上嘅多數係名模或紅星，格調同呢次好唔同。只盼基仔唔好因為失意國際賽而放縱，放縱都要縱得其所。