港股調整僅半日，結果都係升市收場，連升6日。恒指噚日最低只係落到11990，跌126點，在12000關口承接力好強，由滙控（005）帶頭，下晝行情掉頭回升，一路掃到尾，高收12198，升81點，成交123億元。
成交減少，同升市唔配合，投資者顯然對入市好審慎。事實上，人人都預期大市要調整，但人同此心之時，調整就可能唔會出現（只係短期而言）。家吓恒指仍受制於50日線（12182），若進一步拋離，唔排除先衝上12500至12700，然後先出現較大幅度嘅調整。
滙控係噚日升市嘅大功臣，高收117.5元，升2元。早輪滙控落到110元水平時，大行重係咁沽，唔夠幾日，又見佢哋買番晒轉頭。基金當滙控係套戥工具多過係投資工具；但散戶揸住佢，對短期波幅唔使太介懷，長揸必有利可圖，只要滙控上到大行嘅目標價130元，再加上4厘幾嘅年息，收穫已算幾好。
國企早段調整，午市全面反彈，收市就榮辱互見。最強勢係江銅（358），早段低見3.225元，午後傳來上海期交所大部份期銅合約漲停板嘅消息，股價又坐火箭，搶到上3.55元高收，倒升0.2元；中鋁（2600）亦由4.275元回升到4.475元收，升5仙。
石化股以上海石化（338）個勢最靚，收2.475元，升1個位。高盛證券噚日調升中石化（386）（上石化嘅母公司）的目標價至3.65元，即係看好石化業前景，預期未來數年盈利會有理想增長。由於宏觀調控的影響並不大，加上需求仍處於旺盛階段，預計石化行業的高峯期，至少可維持到2006年。
今年首季，上石化已獲利7.36億元（人民幣．下同），升1.4倍，已超過03年盈利之半數，保守估計04年（12月年結）獲利23億元，升64.2%，每股盈利0.32元（折0.3港元），派息8.5港仙，以PE10倍計，股價已可見3.0元，息率仍有2.83厘，中線可財息兼收。
上石化由4月初高位4元回落，跌到2元水平才反彈，近1個月，走勢形成頭肩底，頸線在2.625元，若衝破，量度升幅3.25元。上石化股價已回升上250日線（2.42元）之上，10日線升越20日線後，升勢將會轉急。
郭兆誠