噚日八方同大家講過,自稱同已故戴安娜王妃通過靈嘅靈媒BettyPalko預言,一位女強人將會接阿董個位,出任第三屆特首。到底呢位女強人會係范太、余若薇定係陳太呢?
冇錯,陳太真係重有機會㗎!
老董做咗一屆半特首,已經搞到香港永無寧日,由邊個出任第三屆特首變咗北京最傷腦筋嘅一件事。北京好似話希望呢個人連民主派都可以接受,聽聞有好多人第一時間諗起陳方安生。咁又唔怪得外界唔敢睇小呢位香港良心,因為佢自從由政府退咗落嚟,就從未停過就香港問題發表意見,佢自己永遠都四萬咁口,中方都睇佢唔透,所以會有人叫阿飛代問佢參唔參加第二屆特首選舉嘅古仔。
陳太嘅實力超晒班,又有國際公信力,但經過飛哥一役,中國重敢信呢啲「港英餘孽」?佢哋受過英國人嘅文明教化,到緊急關頭,都以良心為先,而唔係諗到自己利益,係做唔到絕對服從所謂黨中央指示要求㗎喇。
傳真︰2623-9278
電郵︰