恒指同國指連升5日，似乎會有啲壓力，個別發展將更明顯。炒輪搵食，不妨先鎖定啲落後股份博追番上去，然後揀相關Call輪埋手。電盈（008）近期慢啲，但到咗上周五轉強，收5.30元，升15仙，同其他電訊股相比，仍然落後。與國內網通結盟事件一旦有進展，股價升勢料將加速。
揀電盈Call輪炒，有少少難度。例牌輪一係冇乜成交（如9425），一係溢價高到離譜望多兩眼都多餘（例如9776、9618、9308、9866，平均溢價近30%），買唔落手。可以諗得吓嘅，係特種輪9762。
9762由比聯發行，屬「鎖定回報」輪，電盈輪中交投最大嘅係佢，上周五易手量102球，銀碼接近19球，收報18.5仙。有啲大利市機打出嚟嘅數據，係溢價1.6%，槓桿率28.6倍。隻輪係特種輪，數據計算非常複雜，唔可以睇表面，本報行情表凡係特種輪都唔列出數據，有啲大利市機亦唔打出嚟。睇番發行商提供嘅資料，9762嘅溢價係8.6%，槓桿率28.6倍，有效槓桿率呢？係5.2倍。
9762喺10月到期，按發行條款，隻輪有6個季度結算。前4個季度，隻輪嘅鎖定回報值係0，𠵱家重有兩個季度去博。雖然係咁，以佢嘅5.2倍有效槓桿率計，電盈升升跌跌，9762點都會跟，加上佢成交大，啱晒炒上落。
章盛