韓國靚仔男星張赫早幾日同拍檔全智賢嚟香港宣傳新片《野蠻師姐》，佢重特別接受本地傳媒嘅訪問，我羅拉見過呢位魅力十足嘅型男之後，都覺得佢相當平易近人。
赫哥能夠咁快竄紅梗係有佢過人之處，佢一開始就話雖然香港天氣好熱，但係見到大家咁熱情，所以一啲都唔辛苦，佢重大讚香港海鮮好食過韓國多多聲，真係相當識做；而當佢見到導演郭在容入嚟，更即刻大叫佢係「最好嘅導演」，呢啲咁識𠱁人嘅演員去邊度搵呀。
赫哥話睇過港產片《無間道》之後覺得好鍾意，所以希望有機會同片中兩位主角梁朝偉、劉德華合作，而且最好係拍一啲剛強男性化嘅戲。至於女角方面，張赫除咗話拍過韓片《白蘭》嘅張栢芝喺當地好紅之外，亦表示想同章子怡、王祖賢呢啲女星合作。
其實赫哥早幾年曾經同陳果及李燦森合作過《人民公廁》，原來佢大學一年級睇過《香港製造》後已經好欣賞陳果嘅作品，所以希望日後重可以同陳、李兩人合作喎。
講番佢套戲，喺片中扮演正直老師嘅張赫，同暴力女警全智賢發展戀情，但喺現實生活度，赫哥就坦言未遇過咁野蠻嘅女友，但係佢話：「我認為兩個人相處最緊要真心，自私自利淨係顧自己先至叫做野蠻。」另外有記者問佢會唔會全裸演出，赫哥就話為錢就一定唔會，如果真係劇情需要就有得諗。
攝影、採訪：李恒聰
