上個禮拜五，滙豐喺倫敦開股東大會，其間有個清潔公司嘅工人代表發言，話要向滙豐主席龐約翰致敬，因為呢個工人代表兩年前，曾經喺股東會上向龐大班表示，由於滙豐將清潔工作外判，而佢間公司俾判頭剝削，人工被壓到好低，經過龐大班介入後，佢哋嘅人工已經提高番。
呢個工人代表重送咗本書畀龐大班，大班重話呢本書佢都諗住買嚟睇。呢本連滙豐大班都話想睇嘅書叫做《WhoRunsThisPlace?：TheAnatomyofBritaininthe21stCentury》，作者係AnthonySampson，上個月至出版。
本書係分析𠵱家英國社會嘅權力不公平現象，權力只係集中喺少數人手中，包括貝理雅政府同埋公司董事，作者希望英國公民可以運用佢哋嘅民主權力，包括作為選民及公司股東。其實作者Sampson喺四十年前曾經寫過名為《TheAnatomyofBritain》嘅書，分析當時嘅社會權力現象，佢慨歎四十年來濫用權力喺英國並無改善。
難得龐大班對社會公義都咁有興趣，難怪滙豐喺市民心中嘅威信愈來愈高，因為艾爾敦等老細喝住市民唔好立亂買樓，比起一班親中擦鞋地產商，簡直係一股清流。
傳真︰2623-9278
電郵︰