神州車訊：<br>奧迪快馬AudiLeMansquattro現身北京神州車訊：
奧迪快馬AudiLeMansquattro現身北京
早前閃電式到北京，除咗試部跑得又睇得嘅奧迪最新A8L，勤奮又上進嘅我又點會攤喺酒店唔出嚟探路吖？上京第一個朝早就竄咗去奧迪第一間位於大陸嘅展覽廳AudiForum，先發覺同香港得嗰幾盞大光燈射住啲新車嘅showroom好唔同；就連喺北京嘅最後一餐晚飯都竟然可以親眼睇到部同廠嘅概念車LeMans，今次神州之旅果然不枉此行！
記者、攝影：朱維達
試車前傳：參觀神州第一展覽廳
記得當日下晝先去試車，於是朝早就走咗去北京市長安街與東單大街路口東方廣場嘅AudiForum處昅昅，身為德國奧迪第一間神州showroom當然有唔少嘢睇啦！嗰日除咗有性感高䠷嘅露膊靚女，重有展示廳、投影區、兩間專賣店等，加埋電視幕牆配合杜比環迴音響，好似北京市嘅新景點，真係唔買都可以嚟睇吓！
搶爆鏡
■概念車LeMans前10幾組LED燈，加埋兩位火辣蛇腰美女，夠晒燦眼！
激光胎軨
■會場內激光周圍射，眼見嘅係奧迪專用唔同寸數嘅胎軨，全部以1:1展出，重有每條軨嘅簡介，你可以親手摸摸佢哋嘅質感。
高層到訪
■奧迪公司主席文德恩（前左一）同設計A8L嘅哈肯勃格博士（右一）等高層一同出席是次在展覽館的新車發布會。
精品Show
■除咗圖中所見嘅軚環、合金軨、皮套可讓你親自摸摸，另有其他相關用品，就連鋼筆到太陽鏡都有，名副其實展覽館。
鳳姐復出
■淨係呢一襲枱布式大紅裙已經唔少嘢啦！有啲徐少鳳feel，加埋火辣髮型、紅唇、頸鏈，問你點頂!?
北京萬綺雯
■場館內啲雷射激光同燈箱設計十足開Party咁，突然發現萬綺雯都嚟咗……原來係接待員嚟，光線問題啫！
飯局後記：快馬突然出現
食完喺北京最後一餐晚飯時，出到王府飯店門口突然見到一部早前喺法蘭克福車展出現過嘅奧迪LeMansquattro四驅超級跑車！
呢部德國快馬嘅概念車由起步加速到100km/h只係3.7秒，除咗因為佢用上V型十缸引擎設計配合渦輪增壓後，最大馬力輸出達610匹，而且車架由碳纖維製成，致令車重只有1,530kg，雖則如此，部車去到超過300公里時，依舊有足夠下壓力穩定車身，預計2005年可投入生產。錯失上次去法蘭克福車展嘅機會，今次卻俾我親眼見到呢架SuperCar，加埋有兩位蛇腰靚女俾我哋任影唔嬲，Wow！不枉此行啦！
最高相機
■在各奧迪公司高層一輪英夾德語演說後，幕後便「轉出」最新A8L，各大陸香港傳媒紛紛舉機，高大嘅我當然唔使擔梯就影到呢幅相啦！
福士對着幹
■位處東方廣場嘅AudiForum前開設了接待處，以應付過百傳媒到訪，原來同一層嘅福士showroom就喺forum對面。
LeMansquattroProfile
引擎：5.0公升V10雙turbo引擎（中置）
傳動：6前速F1波箱，四輪驅動
馬力：610ps/6800rpm
扭力：76.5kgm/1750rpm
車重：1,530kg
尺碼：1900×4370×1250mm
0-100公里：3.7秒
好墟冚
■正當部LeMans響晒喉出場時，剛完成飯局後嘅過百傳媒朋友就蜂擁圍睹此車，加埋兩位火辣model任影唔嬲，成為當晚高潮。
快到識飛
■當車速逾120公里，尾翼會自動升高，而當車速回落至80km/h時佢就會自動降番低以減低風阻。
首次展出
■去年9月法蘭克福車展中首次展出嘅SuperCar，當時已經為之哄動，尾偈上用咗玻璃頂設計，似足法拉利。
名人喜宴
■當晚飯局中為隆重其事，更邀得多位國內外嘅知名歌手、演員前來參加呢次喜宴。
過去……未來
■王府飯店嘅門牌坊甚有中國傳統特色，前面突然出現將在2005年投入生產嘅劃時代LeMans，對比強烈。
翻版女子樂坊
■當日除有各奧迪高層及藝人出席晚宴，更有湊唔夠數嘅「女子十二樂坊」表演助興。
軚環控尾翼
■當車速未到120公里，為吸引更多豔羨目光，你可以按下軚環按扭盤，升高尾翼。