工商及科技局局長鬍鬚仔曾俊華噚晚返母校喇沙書院為舊生會聚餐演講，佢主管嗰瓣政策唔算敏感，因此冇乜料爆，但就講咗個好有意思嘅古仔，係有關小提琴家帕爾曼（ItzhakPerlman）九五年喺紐約演奏嘅一次「驚」歷。
帕爾曼曾患小兒麻痹症，行動有啲不便，每次都要費點力氣先可上台開始演奏，當晚帕爾曼演奏時，全場屏息靜氣咁欣賞，點知其中一條弦線突然錚一聲斷咗，曾俊華形容呢吓斷弦聲音好似喺寂靜中一聲槍響咁，大家都好愕然。
反而全場焦點帕爾曼一啲都冇窒住，好鎮定咁同指揮點點頭，當冇事發生過咁繼續演奏，由於斷咗一條弦，演奏自然唔同平時，不過當演奏完畢，全場依然拍爛手掌，為帕爾曼嘅演奏喝采。
面對如潮掌聲，難得帕爾曼好清醒咁示意大家靜一靜，然後先至淡淡然咁講：「你們要知道，有些時候藝術家有責任看看盡其所餘，能譜奏多少樂章。」曾俊華話，自此呢句說話留喺佢腦中。八方都覺得呢句話好有道理，但就千祈唔好吓吓都話啲嘢做得唔好係因為「斷弦」，用嚟做卸責嘅擋箭牌！
（圖）曾俊華（左）返到母校，梗係同神父敍吓舊。
傳真︰2623-9278
電郵︰