立法會搞到一頭煙嘅校本條例今個禮拜終於埋尾，由教統局局長李國章親自去立會草案委員會解畫，立會議員、教協會長張文光估「阿瑟王」今次應該會有讓步，其實阿瑟王同佢個常秘羅范椒芬真係好叻，最初只得天主教陳日君主教反對，點知搞搞吓，竟變咗「教育版23條」，連聖公會呢啲辦學團體都反對，佢哋簡直有當年葉劉淑儀嘅風範。
其實阿瑟王成日話唔好將條例草案政治化，可能阿瑟王係政治新仔，唔記得呢條條例係由當年教統會主席梁錦松同羅范椒芬搞出嚟，阿松當年成日掛喺口邊，就係要搞掂教育界「兩座大山」──教協同辦學團體，根本一開始已經係政治先行，後來政府點大玩拉家長、打辦學團體呢種政治伎倆就更加唔在講，八方只係替學子可憐，畀政府用母語教學玩完一次，又要俾校本條例玩第二次。
傳真︰2623-9278
電郵︰