加燦陳與太太回港探親，住在尖東中心區五星酒店。老陳自稱加燦，乃因佢移民加拿大多年，住在阿爾拔泰省，返到嚟香港，已經唔慣故鄉嘅步伐快速環境，使錢又冇咁豪爽，因此自稱加燦，猶如我哋去到上海，俾人視為港燦，同一道理啫。
加燦陳呢晚去尖東酒店內嘅名店食日本刺身，飲日本清酒，與老婆飲醉食飽之餘，在街頭散步，行到一條天橋，只見女士雲集，似是自由行旅客，行街行到腳軟軟，就挨喺橋邊小休，等候朋友咁款。加燦陳喺阿爾拔泰住得耐，好耐未見過咁多女同胞，不禁望多幾眼，即刻有反應，女同胞對佢眉開眼笑，有一個幾乎想行埋嚟推開陳太。陳太立刻扯住加燦陳手臂，行番轉頭，入咗一間五星酒店咖啡室，唉吔，入邊好多香港女同胞（佢哋講廣東話嘅），打扮性感，扮晒cool，陳太於是又扯住加燦陳鬆人。次日就退房，搬去金鐘，房租貴好多，一於冇計。
左丁山笑陳太：「使乜咁緊張，有你跟住，阿陳點敢亂嚟。」陳太笑曰：「尖東嗰邊有咁多bodyguard，好安全嘅，不過驚住阿陳唔小心撞親人哋嘅body，要賠湯藥費啫。」
好耐以前，聽過一句笑話話：「老婆，我昨晚揸車經過尖東撞到個女人，俾佢搞咗成晚，所以今朝先至返到嚟。」老婆大驚：「個女人冇事吖嘛，有冇受傷呀？佢使唔使入醫院？」加燦陳太太大概聽過，所以情願交貴租都要搬酒店！