中國及香港模特兒在世界大賽中揚威，香港代表張穎四月在港參加世界模特兒大賽香港區比賽時脫穎而出，當晚有份擔任評判的名模蔣怡知道她為港爭光後，亦笑言自己眼光不俗。
蔣怡說：「我對呢個女仔好有印象，因為佢個樣係典型中國女仔樣，但係嗰晚個妝化得太濃，好在都冇影響佢嘅表現，佢嘅表現好突出，嗰晚除咗要着泳衣晚裝外，佢哋重要表演才藝，張穎好明顯好有表演慾同好有自信，唔放過任何一個表現自己嘅機會，重識得同台下觀眾交流，表現已經超越咗做模特兒淨係演繹一件靚衫嘅任務，可以去演戲同選美㖭。」
蔣怡表示，向來都覺得亞洲模特兒不比歐美差，只是中國模特兒行業發展未成熟而已，她說：「中國同香港大把有條件嘅女仔，但係就冇咁多大型比賽畀佢哋去參加，𠵱家大家都愈嚟愈重視呢個行業，有條件嘅女仔咪有機會囉。」她亦笑言今屆世界模特兒比賽在杭州舉行，無疑對亞洲佳麗亦有地利。
香港名模陳嘉容得知中國及香港代表獲得亞季軍後表示十分開心及鼓舞，她說：「真係為亞洲人爭光，亦認定咗亞洲模特兒嘅質素，以前喺國際舞台一場時裝騷可能只會起用一兩個亞洲模特兒，其實我哋嘅水準根本唔比歐美嘅差，而且中國市場咁大，對模特兒將來嘅發展亦會有好大幫助。」
本報記者