煲碟王：<br>《玩轉男人心》王老五覓真愛情

煲碟王：
《玩轉男人心》王老五覓真愛情

《玩轉男人心》缺少咗動作片嗰種緊張場面，幽默得嚟又與笑片嘅無喱頭不同，以輕鬆手法帶出人過中年，喺愛情路上如何尋覓真愛，令人睇得舒舒服服，而男主角積尼高遜用上老練嘅演技，將角色演活過嚟，更令到未到中年嘅觀眾亦能產生共鳴，今個星期剛推出3區DVD，放假煲碟最佳之選。

記者：許福合

售價：$138
華納發行
查詢電話：31281791

玩世不恭
各位想像之中嘅王老五會係點樣？《玩轉男人心》內積尼高遜飾演嘅夏里似乎略為唔同，富有且未婚，不過年齡就大咗些少，年屆63。勉強都可當做個超齡「鑽石王老五」，不過佢有個怪癖，只會追求30歲以下女人。呢個喜好甚至被雜誌報道過呢！一日夏里與新相識女友瑪蓮（阿曼達彼堤飾）到別墅玩。誰知瑪蓮母親名劇作家伊麗嘉（戴安姬頓飾）突然出現，夏里更被當賊扮。因而鬧出唔少笑話，伊麗嘉亦因女兒年齡相差太遠及雜誌報道過夏里嘅「事迹」，對佢印象欠佳。



獨處一屋
呢個時候就發生咗《玩轉男人心》最重要事件。夏里心臟病發，當中帶出唔少笑話外，靚仔醫生祖利安（奇洛里維斯飾）亦出場，雖然只有三十幾歲，原來佢係伊麗嘉Fans，對伊麗嘉大有一見傾情之感。女方似乎亦有些心動。夏里出院後，暫時住喺伊麗嘉家。兩人獨處一屋起初當然唔習慣，不過相處日久，亦發覺對方優點所在。女兒瑪蓮亦察覺兩人關係轉變，向夏里提出分手，兩人之間障礙消失，更係一拍即合。

■夏里與瑪蓮年齡相差一大段，話父女都有人信。

■以為夏里係賊，立即出動刀仔招呼。

■奇洛里維斯飾演醫生祖利安，主診夏里。

■夏里心臟病發入醫院一幕非常搞笑。



情敵出現
尾段雖然笑位唔少，不過就最有意思，尤其講到夏里病好離開後，兩人關係由熱轉冷，夏里對愛情猶豫而卻步。於是竟然失蹤半年，去探訪以往曾飛嘅女友，最後先確定自己人到63歲先至搵到真正愛情，毅然跑到巴黎搵伊麗嘉，可惜呢個時候出現咗第三者祖利安，最後就要睇伊麗嘉如何選擇。此片大玩忘年戀，筆者雖然有排都未到中年，不過亦睇得相當投入過癮，全片節奏輕快，無乜冷場，文片中較為少見。

■用走樓梯治療心臟病，聽過未？

■萬人迷祖利安係伊麗嘉影迷，大表愛慕。

■女兒問題消除，兩人更係一拍即合。



特別收錄
DVD版嘅特別收錄中包括有導演、積尼高遜戴安姬頓訪問片段，另外亦包括刪剪片段。

■因為夏里對愛情猶豫，伊麗嘉以淚洗面，不過反而加快創作，將兩人故事搬上舞台。

■花咗半年時間走訪各地，連樣都變埋。

■確定自己嘅感情後，夏里立即飛到巴黎找伊麗嘉。

■亦可以睇到戴安姬介紹拍攝花絮。

■包括有導演、積尼高遜戴安姬頓訪問片段。