經紀陳噚日同小初提起一隻超級冷門股新世紀集團（234），佢話公司最近用成10球美金的可換股債券，向大股東收購兩艘星洲郵輪部份股權。市場傳聞新世紀稍後將有配股一類嘅活動。
小初有啲唔明，點解呢兩年愈來愈多公司沾手郵輪生意？好似一木國際（162）或澳門實德（487）等，都喺近一兩年搞呢門生意。
新世紀自從喺數年前賣殼之後，一直都低調到不得了，股份成交亦唔多，但股價則企得好硬，就算早排大市跌得咁急，股價亦冇乜受到影響，單睇股價表現，就知新世紀貨源如何歸邊。
新世紀近日頻頻見到有星洲買盤護航，但成交始終唔夠大，若然幕後人士有心做嘢，似乎要加兩錢肉緊，否則好難引人注意。
新世紀噚日升3.75%，收0.83元，但成交股數只得130萬股，金額107.6萬元。但經紀陳話，唔好睇小新世紀，隻股可能高處未算高。小初睇真啲，原來新世紀又創52周新高。
慕容小初