自從飛哥周四喺立法會爆出佢嘅弱點就係佢老婆之後，立法會班尊貴議員個個都變晒愛妻號，張文光話佢太太同個女嘅安全係佢嘅底線，所謂「一人做事一人當」，冇理由禍及妻兒，如果有咁嘅情況，佢都會離開此地。
特區目前雖然全速赤化，但係大家重識苦中作樂。班男議員噚日喺立會同記者講笑，個個都話自己老婆好靚好賢淑，不過單仲偕就話佢老婆幾惡，唔算好賢淑，咁坦白，唔怕俾人扭耳仔？
最誇張就係黃宏發，第一時間喺銀包攞出個仔結婚時拍下嘅全家福，大讚老婆同兩個女又靚又叻，又話個新抱英文好，梗係啦，佢新抱係鬼妹喎！
睇完一張，發叔又攞多張三個仔女嘅合照畀八方睇，佢話佢哋三個𠵱家都喺美國，有讀書嘅有做嘢嘅，不過七月一日，個仔、新抱同個女都話咗一定會返香港參加遊行。
又八方噚日打電話畀朱培慶同曾智華，求證飛哥說話有幾真。華仔話，飛哥宣布唔做嗰日，佢哋的確約咗喺尖東一間酒店tea，其間飛哥收到不下八、九個電話，但佢冇留心對方係咪講普通話，至於三個男人傾咗乜，華仔以私人聚會為由，拒絕透露。
傳真︰2623-9278
電郵︰
