每次新一輯《機戰》系列登場，都必定成為機迷茶餘飯後嘅話題，最新嘅《超級機械人大戰MX》當然唔會例外，今集除咗有《機戰》原有班底外，更有多部新機體出場，為呢個老牌遊戲帶來唔少新鮮感，新作更特別加強戰鬥系統，令戰術靈活性大增，加上加插咗唔少戰鬥動畫喺遊戲內，玩落就好似睇緊動畫一樣咁投入咁緊張，《機戰》Fans必玩！
記者：許福合
《機戰》系列之所以長做長有，人氣依然旺盛嘅主要原因係有大量機種可以選擇，新一集《MX》更係有多無少，而且加入新元素，玩家開始遊戲時，可選擇其中一輯心水《機戰》，喺遊戲進行戰鬥時就可以有額外50%經驗值，升級就話都無咁易！
同時，要進化機體，最大改造值會增加兩段，呢個新玩法除咗令玩家嘅愛機更具戰力外，畀個Tips大家，只要揀選愈早有最多機體登場嘅機戰系列就最着數，玩到後期就可以較輕鬆應付。
講到戰鬥系統，更係變得多元化，其中與前作不同處，係冇得揀機體駕駛員，不論選用邊種系列，主角機體都會由男女主角合力駕駛，令「精神指令」變得更重要，將決定戰場勝負。另一致勝要訣就係活用戰鬥系統，今集嘅「援護邀請」及「合體攻擊」變得更重要，前者只要附近有自己機體具備支援攻擊武器，可以多獲一次攻擊機會，敵方處於優勢時就非常好用；「合體攻擊」可以發動機體相連，使用必殺技，例如高達戰隊使用「合體攻勢」時，戰力就相當於數倍普通攻擊，非常好用。
至於最吸引人玩嘅進化系統，更係冇得彈，每次擊破敵機時，就可以取得金錢、經驗值同PP，其中PP就最重要，過版時可用作提升機師或機體嘅戰力，另外從遊戲中亦可取得武器裝備，好好運用亦能有意想不到嘅效果。最後重要提提畫面，雖然仍然只用2D設計，不過不失，反而係過場或超必動畫就非常不俗，配合上具日本卡通風格配樂，玩得就特別過癮。今集Loading時間唔算長，但人物對話非常繁多，識睇日文者當然能對故事發展了解更多，但如筆者不懂日文者，只要同時按下「R1+O+Start」，就可以一次過將所有對話飛走，慳番唔少時間。
廠商：BANPRESTO
主機：PS2
類型：SLG
遊戲人數：1人
售價：$558
(C)BANPRESTO2004
※DreamStore※（25753285）
※地址：灣仔東方188商場256號舖