美國搖滾女歌手葛妮洛芙（CourtneyLove）行為瘋癲，成日開口夾着脷，查實好多人見到佢都嗌怕。但係金像影后妮歌潔曼（NicoleKidman）就慘啲囉，皆因佢同葛妮喺紐約住埋同一幢住宅，有次葛妮重喺𨋢口度大聲叫佢做八婆，差啲嚇死妮歌。
話說葛妮洛芙不嬲都唔係咁鍾意妮歌潔曼，佢曾經喺電視節目《大衞牙擦騷》度話妮歌係冰后！原來葛妮出入經常撞見妮歌，不過妮歌成日都唔應人，就算葛妮同佢同𨋢，妮歌都照樣當佢透明。
點知有日葛妮終於忍唔住，喺人來人往嘅𨋢口度發難，大聲喝妮歌做八婆，差啲嚇死妮歌，睇怕妮歌呢鋪都要搵定屋搬咯。
雖然葛妮負面新聞日日新鮮，不過有日本漫畫商依然好睇得起佢，早前重打算以葛妮嘅經歷作為新漫畫主角嘅藍本，據講，間漫畫公司會依照葛妮外形畫成一個名為PrincessAi嘅性感女戰士，我羅拉聽聞葛妮重好鍾意呢個角色㖭，佢話：「PrincessAi係半天使半魔鬼，衰在有啲黐黐哋囉。」查實你咪又係黐黐哋！