啱啱呢次拍地賣個滿堂紅，相信九龍城沙浦道地皮，下個月拍賣氣氛唔輸蝕。幅地由嘉華勾出，但唔少發展商有興趣。市場人士一直認為，華懋興趣最濃，因為佢哋兩年前買入隔籬幅地，如果今次得手，可以兩塊相連地一齊發展，規模大得多。
中原馬鞍山分行噚日開業，請嚟華懋吳崇武做嘉賓，送上「金算盤」畀吳生增慶，寓意打響如意算盤，重話呢幅相連地皮，千金難買。
點知，吳崇武話，年初估計，呢幅地皮樓面呎價值千七，𠵱家勾地價已經好貴，成二千蚊，或者到時只會舉一兩次牌，唔得就算數。
另外，對於長實投到馬鞍山地皮，華懋會留起馬鞍山迎濤灣單位，等到長實項目落成至出售。唔通今次華懋想明輸實贏。
馬灣珀麗灣果然夠吸引力，第一日收票已逾千三張。香港置業區域經理余祥話，連外籍客都唔執輸，入埋一份。
一對外籍夫婦，前日一早搵港置入票，佢哋係珀麗灣租客，覺得好住，想買番間。佢哋住緊嗰度，只係望園景，其實鍾情望海兼有露台嘅三期，重話要向西，唔知係咪想望到黃昏日落美景，日日浪漫一番呢？
據講，呢個客諗住買兩房單位，心目中價錢係二百四萬。
珀麗灣日前開始收票，噚日收五百幾，累積過千八張，果然強勁。重有唔少投資者同家庭客，總動員大手入票十張。
市場消息話，下個月十二號內購。
香港信佛嘅人好多，睇吓啲廟宇香火幾咁鼎盛就知。最近內地安排佛指舍利嚟香港展出，引起哄動。屋之島部份員工都話要去睇吓，原來係希望呢件「國寶」可以帶嚟好運，幫佢哋做到生意喎！
有啲員工話，佛學理念可以幫到佢哋面對激烈競爭，持平待客。估唔到呢次佛指舍利嚟港，都有咁大迴響。
潮流興主題商場，信和將大角嘴奧海城一期商場變身運動基地，專賣運動用品及服裝，準備食正奧運條水。
信和近年搞宣傳，手法千變萬化，今次計劃六月六號搞大型動土儀式，重加入歌舞表演。
信和當晚除咗大部份高層出席，重請嚟人氣偶像Twins與Boy's做運動大使，到時想唔迫爆場都唔得啦！
講番運動基地，二十萬方呎，有七十八間店舖，租出六成半，預期八月可以全數租出，每日人流逾二十萬人次。
蘭西
電郵地址：