戴蘊慧前日疑因服食過量藥物送院，舊愛吳國敬寄語她保重身體以照顧兩名兒子，竟惹來戴蘊慧的反感，不但否認曾與對方拍拖，更指吳國敬欠她兩萬元尚未歸還。吳國敬則表示該筆錢是二人拍拖時開聯名戶口儲的錢，其後有人突然結婚並表示不要該筆錢，他又勸戴蘊慧「清醒啲做人」。
著名歌唱老師戴思聰的女兒戴蘊慧，前日疑因服食過量藥物送院，其舊愛吳國敬得知此事後寄語她保重身體好好照顧兩名兒子，又透露兩人當年分手，是因為戴思聰嫌棄他只是一個無名小卒。昨日戴蘊慧在港島香格里拉酒店的房間內舉行記者會，指控吳國敬多年前欠下她兩萬元至今未歸還。
戴蘊慧說：「係葳葳（其妹戴辛尉）前日打畀張衞健，問佢攞吳國敬嘅電話，佢自己有嘢問佢，我冇聯絡過吳國敬，我哋只係十幾歲參加新秀時識，講真，我鍾意靚仔㗎！佢都靚仔，但唔係我嘅type，我老公（前夫）都靚仔㗎！」
而戴蘊慧詢問記者吳國敬在報紙上說了甚麼後，即𤷪𤺧地說：「叫佢唔好講咁多嘢啦，我冇同佢拍過拖，佢寫嗰首乜嘢快樂（《我說過要你快樂》），有人同我講係寫畀我嘅，佢對我有意思我好感激，但係我哋冇嘢喎。」
得知吳國敬寄語她保重自己照顧兒子後，戴蘊慧激動地說：「咁講乜嘢意思？講到我好似發咗癲咁，佢自己勤力啲寫歌啦，我同佢唔係咁熟㗎咋，我嘅電話佢冇，佢嘅電話我又冇，唔使佢擔心喎！我好介意㗎！好驚人話佢係我男友。佢係有才華，但佢識嘅我都識，彈琴我肯定叻過佢，作曲或者冇佢咁叻。好似次次我有事，佢都出嚟講嘢，但我今次唔可以唔出聲，佢需要我幫時我都有幫佢啦！」
記者追問她幫了吳國敬甚麼時，戴蘊慧說：「錢咯！兩萬蚊，好多年前嘅事，叫佢開番張支票，抬頭寫保良局捐咗佢啦，話唔定我遲啲都去保良局做義工。」
戴蘊慧指其前夫、馬來西亞香蕉園太子爺謝志雅每月付她足夠的贍養費，經濟不成問題，不過感情上卻有問題，因為她現時沒男朋友。記者透露有讀者報料指她與一名圈中姓謝的男藝人拍拖，戴蘊慧即笑說：「謝賢？唔係啩！我細妹就傳同霆鋒拍拖，𠵱家又話我同四哥？死啦，我見到四哥實好尷尬，我哋住同一座大廈，咁耐撞到都唔超過十次，但成日見佢揸住電單車好型。司徒華都住喺度，我有時會喺clubhouse撞到佢一齊睇電視，遲啲會唔會傳我同佢㗎！」
其後戴蘊慧又指自己十分渴望拍拖，擇偶條件是高大靚仔，她又表示不打算再出唱片，並說：「唔會啦，我咁老，唔係嗰個年紀。」
此外，戴蘊慧強調自己今次入院並不是自殺，只是因為吃了花雕蟹後，又吸入過量哮喘藥，加上她有服食去水丸減肥，所以引致肚瀉入院。戴蘊慧說：「呢段新聞好肉酸，又話我自殺，我冇咗去醫院嘅權利。」戴蘊慧昨日看來身形瘦削，但面部微腫，她說：「一個咁有心機減肥嘅人點會自殺？洗胃要十個八個鐘，我兩個鐘就行返出嚟啦！」
而戴蘊慧昨日接受商台節目電話訪問時則說：「我係因為吸得過多哮喘藥先入院，之前一晚我係有食過蟹，加上我自己都有食減肥藥，不過食完減肥藥就會瞓得唔好，所以醫生就開咗啲藥等我瞓得好啲，同埋我唔夠瞓都會有哮喘。事實上我最主要係吸得太多哮喘藥先至覺得條氣好喘，咁我朋友就叫車送我入院，之後我就要吸氧氣。」
採訪、攝影：卓美娟、比華利
