港股裂口高開，一舉升破250日線（11753）阻力，逼近12000大關，高收11983，大升291點，成交亦大增到178億元。經過噚日嘅突破性裂口上升後，港股走勢已形成大型島嶼，中期調整已確認到底，今次上升，唔係反彈，而係新升浪開始。上周五，筆者已指出大市有形成小型頭肩底之勢，若衝破11500頸線阻力，上升目標將直指12000，估唔到咁快就到埗。
大市連升4日，餘力未盡，短期升多一二百點後，有機會調整一次，但由於大市已轉勢，調整幅度絕不會大，噚日嘅裂口支持，應該經得起考驗。今後入市策略，每一次調整，都係低吸嘅機會。
好多國企亦係裂口高開，重搶到高收，呢輪推介嘅中鋁（2600）、江銅（358）、兗煤（1171）、石化同電力股，升勢都好急。中鋁一早已有多家大行高掛買盤4.425元，成咗300多萬股後，曾經落番4.3元，但午後又再搶上，結果高收4.5元，升7.1%。江銅更勁，買家如入無人之境，掃到3.45元收市，大升14%；兗煤高收7.6元，亦有7%進帳。江銅咁勁，可留意同佢有關係嘅銀建（171），收1.68元，升5.6%。
地產股全面上升，大價股以新地（016）最威水，大升3.0元；中價股係信置（083）同華連環炮：置（127）較悅目，前者升6.8%，後者升7.2%。至於細價股，則非泛海國際（129）莫屬，收0.295元，大升11.3%。泛海升得有理，中線重可以睇好，理由係：
（1）泛海會計年度係3月結算，去年9月嘅數，每股資產淨值係0.81元。本港樓市去年8月先見底回升，泛海持有各類物業同酒店，價值逾60億元，以保守升值25%計，增值15億元，每股資產淨值上升至1.17元，現時股價折讓係74.7%！
（2）04年度中期蝕本，全年亦唔會好。但現年度（05年3月結），單係出售淺水灣豪宅，再加埋酒店同租金收益，盈利起碼有2.8億元，每股盈利6.8仙，PE只係4.3倍！
（3）泛海2月高價0.47元，落到0.203元先反彈，噚日出現突破性上升裂口，且升破下降軌同20日線，照度上去，上升目標指向0.35元。
郭兆誠