記者協會每年六月都會舉行慈善餐舞會，為個會籌款，商界、政界以及傳媒都好俾面買枱，大會亦例牌會搵位高官做主禮嘉賓，搵個名嘴做fundraiser，專門揼人心口。
不過，今年就唔係幾順利。首先財司唐唐本來答應咗嚟，後來又忽然要帶團去東北，結果益咗馬時亨。點解話益馬仔？因為佢老哥最近同記者嘅關係漸入佳境，有機會再加強溝通，最好不過。馬仔目前人在新加坡訪問，噚日見足一日有關官員，夜晚重坐喺明日之星李顯龍旁邊共進晚宴，真係好威水。
至於名嘴，記協年年都搵毓民，但係佢自從封咪，𠵱家人在何方都唔知，記協主席張炳玲頭都大晒，因為好難搵人替佢，正向各方友好徵求勇士。
聽講當晚嘅節目好豐富，有長實趙國雄扮貓王唱英文歌，苗學禮夫婦跳華爾茲，入自由黨嘅史Sir獻唱，以及蔡素玉唱粵曲，當然唔少得籌得最多錢嘅江素惠小姐份。
（圖）馬時亨（左）噚晚同新加坡副總理李顯龍（右）一齊食晚飯。
傳真︰2623-9278
電郵︰