分析L以前係股票界中人，現在仍與證券有聯繫，左丁山就唔清楚佢做邊一瓣，不過佢喺東方海外做緊三個幾嘅時候就為文推薦，自己又買入，相信賺得好勁，跟住佢又買擎天半島一個單位，重早過地產大好友林奮強，當然又係賺到笑啦，重點使重要寫報告，推薦股票咁辛苦。
呢日午飯有局，碰到分析L，佢話已經搬入擎天半島，管理費幾貴吓，入邊已經裝好晒i-Cable與新電訊電話線（九倉集團），非常方便，弊就弊在佢用開其他寬頻、其他電話，佢要求轉番，誰不知要搞成三個月。分析L話：「大地產集團各有山頭，自己地盤內就用番自己集團嘅電話網絡，正是肥水不流別人田，做消費者用戶，未必有得揀。」原來如此，唔怪得電盈都要搞地產，電盈現在冇同地產集團掛鈎，因此固網生意好易俾人蠶食，OFTA唔會理會。
分析L話成個西九龍與機鐵地鐵有關嘅樓盤嘅管理，都由地鐵公司掌控，管理公司用得錢多，住戶就要照磅。佢話大廈內電梯lobby喺早上居然有奶茶、咖啡供應，唔飲就笨，因為呢啲費用肯定係來自管理費也。如果大家都唔飲，慳番啲錢，叫管理公司減收管理費，得唔得呢？分析L話：「冇咁易，佢哋挖空心思，猛話提供增值服務，目的就係用多啲錢，至於我哋係唔係需要呢類咁好嘅服務，話知你咯！」