被左報捧為「黨中央大美人」嘅中共中央統戰部部長劉延東，噚日同香港「民主女神」、45條關注組嘅余若薇，喺專業聯盟嘅午宴上正面交鋒。問到雙方有冇交流，余大狀同八方呻，大部份時間都喺佢講，重講埋讀書時候嘅嘢同埋私人嘢！咁睇嚟東東真係冇乜點聽意見。
據專業友好告訴八方，東東噚日好開心，每上一道菜就講講講，一講就講到停唔到嘴，佢話有台灣朋友好驚統戰部，因為「統戰部好神秘！又統又戰，要統我哋！」東東話，其實統戰部冇刀冇槍，目的只係兩件事，第一係振興中華、第二係統一祖國。
東東又講到文革。佢話當年佢喺清華讀Year2，因為成績好就俾人寫大字報批鬥，老竇重坐咗五年監。佢好語重心長講，共產黨喺文革真係走咗好多歪路！知就好啦，點解重要喺香港搞咁多嘢。
究竟東東係唔係「黨中央大美人」？八方噚日就同唔少行家研究，有行家點醒八方話：「因為黨中央冇乜女人！東東就變咗大美人囉！」
（圖）劉延東（左）喺午宴上同梁愛詩（右）幾好傾，但就冇同余若薇交流。
傳真︰2623-9278
電郵︰