飛哥爆大鑊，內幕好驚人，話有一個陳姓中方官員，隔好耐冇見，突然打電話畀佢，用相當長嘅篇幅，評論飛哥老婆同千金。飛哥覺得語意有恐嚇成份，為保妻女安危，惟有焗封咪。
若然屬實，咁就非同小可。首先，「朋友妻，不可提」，同你非親非故，冇理由一打電話嚟就好具體咁描述人個老婆同千金。若然唔係施加隱性威嚇，就係對飛哥如花似玉嘅老婆同埋稚齡幼女嘅美色，有所垂涎嘞。
鄭少秋隻歌仔都有唱：「男兒一生保家眷，兒啼妻哭內心零亂」。民建聯曾鈺成，今次又衰在懶聰明，佢陰陰笑咁問飛哥有冇感受到妻女受威脅，俾飛哥明窒佢未夠級數，所以感受唔到壓力。梗係喇，佢自己老婆仔女送晒去加拿大，呢一樣佢就高瞻遠矚過飛哥好多。
不過，今次葉國謙公開聽證會，促成飛哥披露真相，係建立咗奇功，飛哥不畏壓力，實行盡地一煲，捍衞言論自由，真係冇得頂，若然佢𠵱家出嚟直選，一定贏硬啫。
以飛哥喺政界打滾二十年，佢唔細路仔，正如佢訓斥曾鈺成劉江華之流，佢對中方有足夠嘅判斷力，佢唔想遲啲會出事，所以惟有焗住封咪。
事到如今，政府係咪應該成立一個獨立調查委員會，調查真相，包括傳召中方退休官員親臨作證，或者純粹係祖國親切問候，所以引起誤會啫係咪？
若然政府唔調查，飛哥就有責任將事件提交聯合國，向秘書長安南投訴，必要時飛赴紐約作證，協助聯合國更好地執行保護婦孺嘅國際公約嘞。
其實今回飛哥挺身作證，真係幫咗好多人忙，包括嗰班日日諗到頭大如斗都諗唔到橋抹黑三名嘴，來來去去三幅被話乜嘢錢債問題、個人恩怨，今後佢哋唔使再咁傷神，因為講乜都冇人信啦。愛國嘅黑社會都講江湖規矩，有事一人擔當，唔好搞人妻女；阿飛一爆料，連黑社會都升咗一級，有道義過某些愛國人士。
飛哥咁勇，不愧係香港人嘅良心，佢係香港人嘅大哥大，唔止係飛哥，簡直係「大飛」。大飛，你係香港人嘅光榮！
（圖）飛哥冇有怕，噚日喺立會爆大鑊。
傳真︰2623-9278
電郵︰