蘭西早排提過，唔知係咪市場氣氛差咗，有啲標售物業押後截標。𠵱家賣地成績咁好，樓市即時轉勢，竟然重有業主話要推遲截標，唔通個市真係咁唔掂？原來實情係業主想測試市場反應，睇吓係咪可以賣高啲。
韋堅信測量師行助理董事許偉國話，中環雲咸街八號原定聽日截標，業主見整體投資物業市場受利好消息帶動，覺得佢件貨價格重有得升，所以提高意向價，測試市場反應，先至決定推遲至六月九號截標。聽講，業主唔排除收番繼續收租。
雲咸街八號樓高二十七層，每層四千呎，總樓面近九萬八呎，連命名權一齊賣。
美聯物業希望強化品牌，除咗喺電視大賣廣告，重首次贊助賽馬活動，用九十萬，贊助六月六號美聯物業盃。
聽講，美聯當日包咗個沙田馬場廂房，請二百幾人睇跑馬，預算使二百萬，認真大手筆。
睇嚟樓市真係幾好景，若果唔係，咁使法錢，點向股東交代？
拍地之前，住宅樓市一片淡靜，成交萎縮，業主紛紛減價，商廈都唔例外，屋之島董事總經理黃志強話，佢哋今個月，做到七十二宗成交，比上個月減兩成六，其中買賣減三成二，租務減兩成四，慘情。
不過，黃志強一啲都冇唔開心，因為公司做到大額買賣，總值增加四成四，最大宗係中環皇后大道中九號二十六樓，近萬四呎，呎價九三八七，涉資近億三。
佢預期港島商廈，成交量值都可以回升。
世紀21奇豐衝出馬鞍山，去到沙田，噚日沙田第一城分行開業。沙田咁多代理行，想爭多啲市場佔有率，最實際係送吓禮吸引街坊。
由今個月中至下個月尾，經佢哋買樓有嘢送，三百萬以下送曼谷單人機票，價值二千二，三百萬以上送四千七蚊東京機票，如果請佢哋做埋按揭，可以變成機票加酒店四日三夜。放盤業主，送五十蚊超市禮券。
都市人繁忙，時間有限又想掌握所有資訊，惟有靠科技幫手。新地噚日開放葵芳馬灣珀麗灣三期千五呎展銷廳，設有「迷你」影院。新地話，展廳連播放影片與製作費用，耗資千五萬。
為咗令人了解呢個島嶼式概念樓盤擁有嘅景觀，喺樓盤實地安裝攝錄鏡頭，將影到嘅景觀，即時傳送到展銷廳等離子電視播放，於是，身在展銷廳，唔使落島都可感受到樓盤三百六十度景致。形式似電視台「瞬間看地球」，發展商索性叫做「瞬間看珀麗」。
呢個島嶼樓盤，銷售賣點離唔開海景，同埋度假式生活，新地噚日派發載有度假氣息嘅樓書，又送七巧板畀睇樓客。
蘭西
電郵地址：
