要碧咸踢番右中場
球驗客手記：金馬曹擺明有後著

金馬曹做咗皇家馬德里教練之後，勵精圖治，除咗要班球員提早喺七月頭開操之外，重郁埋𠵱家個陣，要碧咸食老本踢番右中場。
金馬曹喺接受訪問時咁講：「碧咸上屆喺皇馬踢中場中間，表現算係唔錯，但佢喺英格蘭國家隊同之前喺曼聯都踢開右中場，佢踢到兩個位置對球隊當然係件好事，不過我會視乎戰術需要，再安排佢踢乜嘢位。」如果碧咸踢返右中場，咁就大件事嘞，事關同佢同位嘅葡萄牙中場費高，就會冇碇企，到時離隊都未定。
其實，皇馬換血就一定㗎嘞，早喺上個星期就成功買咗阿根廷後衞森美爾返嚟；另外，好似朗拿度同卡洛斯就不斷被吹會過檔車路士，所以我求大俠認為，下屆佢哋就算重有六條煙，主角分分鐘唔係今屆呢六個。

巴塞唔敢吼英超兵莫財局搵平價貨
巴塞隆拿喺兜咗四件荷蘭兵後，話會買番四至六件，但講明唔諗英超球員；點解？皆因人工貴囉。同巴塞扯上關係嘅曼聯荷蘭前鋒雲尼斯達羅同車路士英格蘭中場林柏特，周薪要九萬鎊，𠵱家莫財嘅巴塞實唔吼。嗱，效力西維爾嘅巴西中場巴迪斯達平靚正，就啱胃口。

估中列斯新領隊球迷贏六百倍彩金
布力維做到列斯領隊，最開心嗰個一定唔會係佢，而係一個球迷至真。話說有個球迷落注四英鎊（成五十九蚊港紙），買布力維做列斯正式領隊；嗰陣賠率係六百倍，𠵱家布力維跑出，咁佢就執咗二千四百英鎊（成三萬四千蚊港紙）。呢位仁兄獨具慧眼，抵佢贏大錢。

加度素老婆就生意軍規條格外開恩
噚日我哋體育版講到意大利教練查柏東尼白紙黑字訂咗啲規條，但「鬥牛㹴」加度素獲優待、唔受限制，可以隨時出入訓練營，亦唔使吓吓要熄手提電話。並唔係加度素同「老查」關係特別好，只係佢太太蒙妮卡預產期就到，加度素隨時做老竇，果然係法律不外乎人情。

連打兩場馬拉松山度奴認真苦命
法國球手山度奴喺法國網球公開賽首圈打咗成六個半鐘頭先過到關，咁長時間重破紀錄㖭，點知喺第二圈對格魯吉亞嘅拉巴迪斯，對方又係咁捱得，卒之又要打五盤先晉級，真係辛苦命。好在佢第三圈嘅對手梅迪斯喺次圈淘汰盧迪克都打咗五盤，體力上都算扯番平。