呢排經紀陳提供嘅貼士好飄忽，智庫科技（8153）噚日復牌勁升77%，收1.70元，但講到好有誠意嘅先科國際（724），竟然在大升市中倒跌1.6%，收1.20元，實在令小初有些少失望。
經紀陳話，講明係炒股，當然人為因素最重要，噚日港股急升，但二三線股暫時未成氣候，成功炒高亦未必散到貨，所以炒家未必會急於開車。
既然係咁，小初改為吼吓實力股，理文造紙（2314）早前在跌市中被基金沽貨，一度急跌至5元水平，不過在大股東密密增持下，股價止跌回升，噚日再升4.9%，收6.40元。
經紀黃話，理文造紙喺3月底，曾先舊後新批過股，每股6.745元。當時大股東認購新股多過配售舊股部份，所以早前隻股跌成咁，大股東增持，實在唔難理解，亦可以解釋為對公司有信心。
理文造紙的年結日在3月31日，預計將在6至7月期間公布全年業績，市場傳聞業績靚到不得了。
慕容小初