徐熙媛（大S）上年因為同家人嗌交，搞到離家出走兼失蹤，當時佢個妹徐熙娣（小S）重喺電視節目度喊住咁話要尋人。最近大S拍台灣電視劇《戰神》時，又玩失蹤！
有傳因為大S嫌通告太早，所以唔出現咁話，搞到劇組人員白等成日。由於當日由早到晚都係大S嘅戲份，佢咁樣失蹤，真係好影響進度，搞到平時出名好脾氣嘅導演蔡岳勳當場大發脾氣，工作人員即刻通知導演老婆兼套戲嘅編劇虞小卉。
噚日虞小卉同馮仁昭講話導演平時好少發脾氣，佢話：「只能說大家工作態度不一樣，就像老師教書也會常罵學生，因為《戰神》拍得趕，可能大家比較煩躁。」
不過講到大S失蹤，虞小卉話：「沒那麼嚴重吧，我聽到的只是早上遲到。」不過大S所屬的數位傳播經紀公司總監蘇瑩恬就話：「她不曾發生過這種事，她一向很敬業，怎麼可能讓工作人員空等呢？」
而《戰神》男主角周渝民知道呢件事後，第一個反應係：「應該不可能吧！」佢透過經理人力撐大S話：「她很敬業，跟她合作很愉快！」
𠵱家喺哈爾濱拍緊電影嘅趙薇，近日決定進軍韓國。趙薇嘅經理人話，嚟緊趙薇會接拍發生喺上海嘅韓國電視劇，內容係上海某企業裏面，發生咗一段主管愛上員工嘅浪漫愛情故事。呢套劇除咗有趙薇外，重搵嚟人氣歌手Kang-Ta助陣，另外又聯絡緊宋承憲。相信大家都好期待！
韓國收視天后李英愛喺台灣宣傳新劇，佢一向對感情問題三緘其口，點知噚日話：「我打算最遲四十歲前要結婚，只要遇到好姻緣，就會立刻把自己嫁掉。」李英愛跟裴勇俊、李秉憲同車仁表等靚仔合作過，卻從來未傳過緋聞。李英愛話𠵱家冇交往對象，重好幽默咁講：「所以我才來台灣找老公啊！」此外，李英愛啱啱接咗康城得獎導演朴贊郁嘅新片，好快就開拍。
王菲下個月二號會喺新加坡演出巡迴個唱，今次獅城之行會有五十八人隨行。
日前新加坡有報道指阿菲將會入住當地酒店嘅總統套房，但就冇乜要求，只係指定酒店要準備某歐洲牌子嘅礦泉水。唔知咁樣把聲係咪會靚啲呢？
許冠傑復出搞演唱會，唔少歌迷都四圍撲飛。許冠傑賺錢之餘，都不忘做善事，佢呢個「盈科保險繼續微笑會歌神LIVE」演唱會，已經贊助咗啲門票畀博愛醫院，作為博愛醫院緊急援助金籌募經費之用，幫吓有急切需要嘅人士，認真有心！
無綫嘅《十大勁歌金曲頒獎典禮》由八三年開始舉行，今年已經踏入二十一周年。記得當年睇《十大》，個個都勢均力敵，尤其係八十年代，梅艷芳、張國榮同譚詠麟咁，粒粒巨星，爭獎都爭崩頭。無綫嚟緊會將咁多年嘅頒獎禮輯錄成VCD發售，咁樣可以重溫多位已故巨星好似羅文、阿梅同張國榮，馮仁昭覺得幾有紀念價值。
