紅咗之後着得好密實嘅優香，原來細個嗰時已經唔係平凡之輩。最近我羅拉搵到一批佢童年時代嘅相，發覺佢個樣同𠵱家冇乜點變，證明佢冇整個過容。
咁大家一定會諗，又唔係為錢，點解優香要出嚟拍水着寫真呢？優香佢最近喺本雜誌度真情剖白，佢話：「有星探搵我嗰時，我有個要好嘅男友，心想做唔做明星根本冇所謂。但後嚟我俾人拋棄，傷心咗三個月，之後就諗，加入演藝界生活起碼有啲改變，所以就入呢行囉。」
優香同其他水着女星一樣，入行初時好難接受畀啲男人眼甘甘咁望實佢，但係佢話：「當拍水着令我大受歡迎，我先至覺得原來胸大真係有好處㗎，諗番小學五、六年級時，我個胸突然變大，重令我好鬼死唔開心㖭。」
而優香𠵱家一心做女優唔再行性感，喺演戲方面又好似真係好畀心機喎。好似佢同香取慎吾拍緊套大型古裝劇《新選組！》，佢飾演一個京都藝伎，而且係香取嘅情婦，佢話：「我嘅角色喺現代係俾人唾罵嘅角色，我都唔係太鍾意，不過喺古代係好正常嘅！慘就慘在套戲服重成十公斤囉！」