著名歌唱老師戴思聰的女兒戴蘊慧，昨日疑因服食過量藥物送院治療，戴蘊慧的舊愛吳國敬得悉此事後表示不會到醫院探訪，但寄語對方保重身體以照顧兩名兒子。吳國敬又大爆當年與戴蘊慧分手，其實是因為戴思聰嫌棄他是無名小卒，刻意棒打鴛鴦，更將戴蘊慧嫁給馬來西亞香蕉園太子爺謝志雅。
戴蘊慧昨日疑因服食過量藥物，被送往瑪麗醫院接受治療。戴蘊慧早年曾跟吳國敬拍拖三年，據知其父戴思聰因嫌棄當年的吳國敬只是無名小卒一名，估計他不能帶給女兒終身幸福，所以棒打鴛鴦，刻意介紹了一名馬來西亞香蕉園太子爺謝志雅給戴蘊慧，結果她不久即向吳國敬提出分手嫁給謝志雅。
記者昨日致電吳國敬，他當時還不知道戴蘊慧疑因服食過量安眠藥送院，得悉此事後他說：「我哋近年好少聯絡，只係有時喺公開場合見面打吓招呼。我覺得人生唔係淨得悲哀，遇到唔開心可以搵朋友開解吓，始終問題都要積極面對解決，希望佢睇在兩個仔份上，自己要保重。」
問到吳國敬當年與戴蘊慧分手，是否因戴思聰刻意拆散二人，又故意介紹謝志雅給女兒認識時，吳國敬說：「有啲嘢過咗去就算，不過佢當年咁做都啱嘅，我哋大家事業都剛剛起步，我都養唔起佢，咁做咪累鬥累。」
再問到二人分手主要原因是否戴思聰？吳國敬說：「我知道有人唔係咁鍾意，我哋都曾經努力過，但可能我哋真係緣份已盡。我只可以講當年分手，我都好痛心，差啲做儍事，但好彩最後冇做到。」
據知戴蘊慧至今仍十分懷念與吳國敬的初戀情，昨日入院後，其胞妹戴辛尉（葳葳）亦曾找朋友聯絡吳國敬。吳國敬昨日說：「葳葳係好似搵過我，不過我重未覆佢。」問吳國敬可會到醫院探訪舊愛？他說：「我諗唔會啦！都唔係咁方便。」吳國敬表示現正積極發展事業，暫時不打算拍拖。
戴蘊慧八四年參加《第三屆新秀歌唱大賽》取得銀獎，隨即加入樂壇，翌年與參加新秀歌唱比賽的吳國敬邂逅，八八年共墮愛河，不過拍拖三年便告分手。九一年戴蘊慧下嫁謝志雅，婚後定居新加坡並育有兩子，至九七年有傳戴蘊慧念念不忘初戀男友吳國敬，婚姻亦亮紅燈，不久與丈夫離婚。而九九年戴蘊慧曾被指在四十三小時內三度自殺，迫台灣男友霍經倫來港。
記者昨日致電戴思聰，問他當年是否嫌吳國敬窮故不允許女兒與他拍拖，並刻意介紹富家子給女兒？他說：「唔好咁講，我邊有咁多男人介紹，真真（戴蘊慧）當時年紀好細，我提醒佢適當年紀做適當嘅嘢，唔好沉迷拍拖，教女梗係咁。人生喺唔同階段要做唔同嘅嘢，我一向好民主，𠵱家真真又結過婚，都離埋婚，我都會畀佢女大女世界，就算將來揀邊個再婚，都畀佢自己揸主意。」
採訪：比華利 攝影：陳慧安
