許志安、鄭伊健與李克勤日前在保齡球場拍戲，克勤順道帶備私家波操練，他表示一向有跟劉德華學打保齡，更準備日後與華仔爭一日之長短。
李克勤、許志安、鄭伊健及杜汶澤日前在奧海城保齡球場拍攝新戲《六壯士》，內容講述四位大男人邊打保齡邊傾心事，原來安仔、克勤及伊健都有私家保齡球，不過當晚只得克勤出動私伙，他們更趁未埋位時打保齡過手癮。
克勤接受訪問時表示他一路有跟隨劉德華學打保齡，他說：「我一路都有同梁榮忠、華仔打，同譚詠麟就多數打golf。安仔都有私家波，有自己架生嘅人都有番咁上下㗎。華仔話我係可造之材，假以時日可以同佢爭一日長短，不過佢冇話時日係幾長。」
伊健就表示雖然自己有私家波，但卻不大喜歡打保齡，伊健說：「之前同梁詠琪打保齡時俾人影相，我一年就係打嗰三次，竟然三次都有人影，重寫埋啲揸波龍爪手，屎波情侶咁，好事變壞事，以後都唔打呀。」
安仔則謂他將自己的私家波放在南華會的儲物箱達三年之久，早前他往取回時，深怕布滿蜘蛛網及昆蟲，故要求助手開門，安仔說：「我以前同蘇永康、梁漢文成班一齊打保齡，朝早打完先開工，後來轉打枱波先冇打，克勤就好勁，不過我𠵱家愛上滑水呀。」
採訪、攝影：李珮洳
