民主黨涂謹申：特區政府喺最近嘅事件中對言論自由能夠做啲乜，佢有冇做到盡呢？有冇正如佢哋新聞公布所講，係堅決維護保障新聞言論自由？抑或係到呢個時間佢都無能為力？特首係代表特區利益，上去同最高領導層講，有冇用呢？定係做嚟都嘥氣？
李鵬飛：毓民連𠵱家喺邊都唔話畀我知，走前嘅周日非常之驚慌咁樣，手騰腳震，鬧蔡東豪同梁文道唔同佢續約，禮拜一重騰得緊要，周二我打畀佢問係咪會封咪，佢話唔係，「我封咪之前一定會話畀你聽」。到禮拜四，走咗喎，Goodbye都唔講聲，禮拜六佢打電話畀我，唔能夠話畀我聽乜嘢原因，佢覺得自己處於好危險嘅階段。
特區政府到𠵱家為止，冇做到應該做嘅嘢，點解咁講呢？毓民走咗，大班連立法會都唔嚟作證，但特區政府又可以做到啲乜呢？向中央交涉呀？唔會嘅！所以我好同情特區政府𠵱家嘅處境，社會發生嚴重分化，我希望中國大家庭主持人做啲嘢解決香港𠵱家嘅憂慮，因為特區政府能夠做乜嘢？好似有聽眾打嚟話有關九月選舉，好多人話國內官員參與，有官員話境內境外犯規嘅都會調查，調查乜嘢？所以我自己本身都幾同情特區政府本身，喺呢件事件上好難做到嘢。
前綫劉慧卿：李生有冇覺得，香港嘅言論自由、新聞自由受到史無前例嘅壓力？李生你自己有冇感受到人身安全有壓力？作為人大代表嘅中方陣營會唔會有言論自由？贊唔贊成就呢件事展開高層次調查？
李鵬飛：關於人身安全，我係有分析力、判斷力嘅人，我唔會畀佢行到嗰一步，令我感覺到有人身安全問題。因為我主持節目第一日，播咗一段大班嘅講話，但剪咗好多帶啊。各位議員，我從未見過大班喊得咁緊要，大班喺市民心目中係硬漢子，鍾意鬧就鬧。我叫人剪咗啲帶，因為播出嘅淨係佢喺度喊。
我唔想自己有咁嘅一日，而我預測，因為我繼續拒絕、繼續拒絕見任何人嘅話，嗰一日可能來臨，所以我多謝你，我唔使人身保護。我亦從未見過毓民咁情況，你哋可以問蔡東豪、梁文道，叫佢哋講嗰日同佢嘅見面情況。我絕對唔會畀人打電話畀我太太，或者話畀我聽啲嘢，令我屋企唔舒服，我唔會行到嗰一步，重有其他次要嘅原因，好多層次，好少諗嘢諗咁耐，十年都冇寫篇嘢（講稿），好少，所以情況我覺得係嚴重嘅，點解到咁地步？點解佢（黃毓民）要咁樣走咗？我覺得香港政府應該要問一問，所以警方嘅statement﹙聲明﹚令人可笑。
人大代表嘅言論，我去北京開會時係有言論自由，兩會開會時我哋批評係嚴厲啲，言論不受任何限制。但我嘅經驗係，真係有人想話畀我聽我做節目（的風格），幾次俾領導人階級教訓過。如果香港政府𠵱家採取嘅態度係咁，我一介平民冇符㗎，有乜嘢符啫。政府唔肯去調查，唔方便調查我嘅事件，我已經嚟講咗，但一位手騰腳震（黃毓民），一位喊苦喊忽（鄭經翰），都唔去問，任何常人都會問吓，到底點解？
民主黨鄭家富：過去你一直頂得住升溫嘅壓力，直到五月十八日陳姓官員嘅電話，會唔會令你覺得白色恐怖氣氛？言論自由、一國兩制已死去？
李鵬飛：我知道呢個節目一定非常富爭論性，香港最受歡迎，不斷有呢啲咁嘅人接觸我，甚至重高級嘅人，不斷來搵我，我能夠拒絕幾多個？最後會唔會有人打電話畀我老婆，我太太係家庭小婦人，我唔想佢接任何電話，連記者電話我都唔想佢接，我參政二十年，連我辭去《風波裡的茶杯》，我都冇話畀佢聽，點解呢位陳姓官員同我傾太太同女，總之我覺得好唔comfortable（舒服）。
獨立議員陳偉業：飛哥講嘅過程好似岳飛俾十二道金牌逐步壓迫，佢醒目啲，唔等到十二道金牌發到。𠵱家係咪香港事務中央已全面介入，意圖影響香港傳媒言論，已違反一國兩制，係咪香港政府係絕對冇能力捍衞執行《基本法》，𠵱家香港烏煙瘴氣一塌胡塗，董建華要負責，定係中央破壞一國兩制？
李鵬飛：中央領導層係唔想插手，但當你見到舊年以來發生嘅事，同埋香港政府嘅施政效率，以及喺市民心目中嘅地位，令中央冇辦法唔出手，中央官員來港，唔係佢想來搞你。但係中央亦都犯咗好大錯誤，關於香港管治咁差，點解呢？如果大班、毓民、李鵬飛幾句話搞成咁，大佬，我哋係超人嚟咩！
民主黨張文光：中央對你主持節目嘅立場幾經轉折，由同意到批評到教訓到反對，到最後叫你可以再做番《風波》，你覺得轉變理由係乜？你最恐懼係乜？怕中央干預你主持風格？怕失去一啲好耐嘅朋友？怕家人遭受滋擾？怕有大班同毓民嘅下場？中央係咪覺得你做會接近中央立場，但最後發現唔對頭先要各種方法要你離開？
李鵬飛：怕乜嘢？我就係唔想怕乜嘢，不如唔好做……我唔可以做兩面不是人嘅事，今次若我決定再返去做（節目），我都唔會改變，改變嗰個就唔係李鵬飛。
獨立議員余若薇：可唔可以量化中國領導人有幾多次教訓你？講緊去到乜嘢層次？內容係乜？佢話英文《中國日報》唔代表中央意思，咁中央意思係咩？
李鵬飛：我想話畀各位聽，中央對香港緊張程度，對呢次選舉緊張程度，係我咁多年以來，甚至對於過渡安排時，都未見過咁緊張，未見過嘅，所以我嘅結論，𠵱家一切事情，都係同選舉有關。今次人大開會，我都有個人參與一啲會議，係一對一咁講選舉。我解釋畀佢聽，睇小民主派攞唔到三十票，你明㗎啦。
民建聯劉江華：從未有一個中央官員同飛哥講，你收聲啦，你封咪啦，唔好喺商台做，有文章批評你，但都有訊息話唔代表中央意思，陳姓官員提到你太太女兒，你可能感覺威嚇要報警，但你似乎冇感到威嚇，幾件事加埋，只睇到你唔喺商台做，聯繫到言論自由，更加聯繫到中央出手打壓，似乎唔係合適嘅推理。
李鵬飛：對我李鵬飛要出到威嚇，就好低莊。陳姓官員咁講，我同太太冇任何印象，但佢一定知道嗰件事嘅，因為我個女係做司儀吖嘛，我亦問過佢，你夜晚十點半之後打嚟，係咪想同我傾我太太同個女嘅事？唔係吖嘛！佢提嚟做乜？同我講做節目咪講節目囉！我收聲令人happy﹙開心﹚。係咪過敏？我唔畀佢happen（發生），我唔想佢打畀我太太，我點知我太太有乜嘢反應？
係咪中方打壓？你有冇問到，惡死騰騰嘅毓民做乜嘢手騰腳震咁走人？鬧人唔使計數唔使本嘅鄭經翰，返到嚟聲都冇得出？你哋自己作判斷。你冇判斷力，做議員嚟做乜？邊個講你就信。對我來講，我已經離開咗「是非竇」。
法律界代表吳靄儀：言論自由係要人免於恐懼，但呢啲唔係一般壓力，聽你講係一種特務嘅手段，話畀你聽我知好多關於你嘅事，你屋企人嘅事，𠵱家唔係打算有乜嘢行動或者威嚇你，但係已經令你知道，你再咁落去，係會有啲乜嘢可能嘅後果，由於每個人都有弱點，呢種手法未去到恐嚇，但係一種好特殊手法。如果唔係中央最高層意思，又係邊個嘅主意？
李鵬飛：你話得啱，每個人都有弱點，我李鵬飛最大弱點就係我太太，我參政二十年，包括七年在行政會議期間，從來冇人咁打電話畀我。
我對中國領導人有一定信心，相信係下面嘅辦事人用自己方法去做，正如維港巨星匯，政府好心出一億辦到歌舞昇平，但辦事人搞到一鑊粥，我好難想像以今日中國領導人，以佢哋治國智慧，會做到呢一步。但中央對今次選舉好緊張，話要搞掂佢，下面嘅人對點做有自己嘅理解，呢個反而係最可怕嘅。
民建聯曾鈺成：我想問清楚，到今日呢分鐘為止，李鵬飛先生有冇感受到佢本人或者家人嘅安全受到任何威脅？第二，佢有冇諗過企硬，《中國日報》出文章當佢死嘅，後果除咗啲人嚟煩佢，煩得幾多次之外，對佢本身或者佢屋企人有乜嘢實際威脅？
李鵬飛：好多唔同嘅威脅，睇壓力從邊度嚟。如果你曾鈺成感受唔到我嘅感受，我同你真係唔同層次，真係唔同級數。
曾鈺成：我以前都有人煩過我太太，但我唔會覺得係政治威嚇、打壓，係扼殺參政自由。
李鵬飛：大家可能睇法唔同，遭遇不同，我講出我遭遇，你自己判斷。
（答問內容經本報綜合整理）