數碼影音：<br>明搶DVD錄影機市場速錄王燒碟唔使10分鐘

數碼影音：
明搶DVD錄影機市場速錄王燒碟唔使10分鐘

早排DVD錄影機聲勢逼人，㩒吓個掣就錄到電視，加上國產品牌以二千幾蚊平價入侵，大有取代傳統錄影機之勢。儲存王Iomega睇中呢個大趨勢，將旗下新款DVD燒碟機重新包裝，賣嘅同樣係一㩒即錄嘅便利，兼且借助電腦運算能力，大量實用功能即時奉上，而且燒錄速度更達8×，抄滿一隻4.7GBDVD-R唔使10分鐘！
記者、攝影：徐影龍
ImageGirl：小蕙

外置式DVD燒碟機周街都係，要產品跑贏人哋，齋鬥燒錄速度就冇咩意思，所以Iomega就好聰明咁加入視訊Input功能喺SuperDVD度，配合電腦上嘅一系列軟件，實用性即時倍升。最方便就係個「QuickTouch」系統，只要一按機上嘅速錄掣，電腦就會開啟錄影程式，即時編碼後再自動燒落隻DVD度，過程完全冇難度，真係上至阿媽下至妹頭都識用。
一隻4.7GBDVD碟大概可收錄約2小時高解像影片，接駁錄影機後，不但可隨時錄低電視節目，更可將屋企一堆過期錄影帶作數碼化儲存都得。再玩盡啲，亦可駁DV錄低生活片段、駁PS2自製勁Game爆機精華等，好玩與實用兼備。

■一按QuickTouch掣，就即時擷取畫面，之後重識自動燒埋DVD。

■錄影解像度有三種，一隻DVD已可錄下兩小時高質素影片。

三制式燒得快錄得晒
SuperDVD具有最高8×燒錄功能，比其他DVD錄影機嘅4×快一倍，燒滿一隻4.7GB嘅DVD-R，只需八分幾鐘，備份大量電腦資料夠爽快。而錄影方面，官方公布編碼時間計法為×1.5，即係錄一個鐘電視，約需個半鐘完成錄影及燒碟，而且電腦CPU要求只係PIII800MHz，時間上的確算幾快，唔似以前咁編輯一段片都要等餐懵。
另一過人之處，就係SuperDVD支援DVD+R/RW、DVD-R/RW及DVD-RAM三大燒錄制式，兼容度高令用家唔怕燒出嚟嘅DVD睇唔到，舊有可複寫嘅RW碟或DVD-RAM都唔會嘥。SuperDVD賣$2,699，而目前市面上嘅外置式8×DVD燒碟機超過二千蚊，比多幾百蚊買個QuickTouch功能都唔算貴。

SuperDVD燒錄速度表
DVD+R（8×） DVD+RW（4×）
DVD-R（4×） DVD-RW（2×）
DVD-RAM（3×） CD-R（24×）

■三大DVD燒錄制式都支援，最高速更達8×。



QuickTouch三大用途

■五盞訊號燈清楚表明燒錄狀態，幾時燒完碟一望就知。

■只有傳統AV及S-Video插頭，要錄電視須先駁錄影機。

■1﹒駁錄影機後可錄電視節目，又或將舊帶數碼化保存。

■2﹒辛苦打爆機，梗要錄低佢慢慢回味。

■3﹒駁DV後即燒成DVD，唔識電腦一樣玩得。

好玩軟件自製DVD
SuperDVD第一賣點係簡單易用，不過對其他玩過影像編輯嘅用家，亦提供多款影像軟件，畀佢哋發揮無窮創意。首先就係製作影像DVD嘅《MyDVD》，呢款軟件獲獎無數，筆者用咗一年亦相當之滿意，不但介面簡單易用，而且備有多款主題方案，方便製作靚靚DVDMenu，最正係完成後嘅編碼工作需時不多，連筆者部老爺PIII800MHz都夠用。
跟機重有款《HotBurnPro》軟件，主要製作音樂光碟、MP3/WMA光碟、資料DVD等用途，當然亦唔少得由Iomega力推嘅《AutomaticBackup》，將可複寫嘅DVD-RW或CD-RW，當做硬碟咁用，拖、拉、放就可更新DVD內資料，又一方便之作。

■《HotBurnPro》燒齊唔同用途嘅光碟，連相片加音軌嘅CDExtra都燒到。



抵讚：DVD燒碟機＋TVBox兩大功能，實用性大增，一按即錄亦方便不懂電腦之人士，賣價亦算可接受。

要彈：始終要靠電腦幫忙編碼運算，唔夠獨立性，而且賣相唔吸引，機身亦比其他燒碟機大一半以上。

香港總代理：盈茂電腦
電話：25649200

■唔使羨慕荷李活DVD菜單咁靚，用《MyDVD》自己一樣做得到。

■由封套、封底到CD都可自行設計，畀你發揮無盡創意。