港股假後大升，追番美股周二升幅，兼反映賣地成績理想，地產股備受追捧，恒指收報11983，升291點。
不過，阿虎好多朋友噚日關心立法會討論「名嘴封咪」事件，重多過炒股（因為大市一開已抽高至11900水平，再追未必有水位，又唔敢沽空，惟有靜觀其變）。好多老友都想知飛哥會否爆大鑊，大家又不約而同地懷疑，周二賣地之前是否有中央官員向地主傳話要以大局為重，玩完「名嘴封咪」後，再玩「地主焗舉」，立法會不如傳埋啲地主作供啦。
地產股噚日勁升，連負債較高的新世界發展（017）都勁升5%，不過麗展（488）就完全冇表現，逆市跌1.9%，收0.152元。麗展本身土地儲備唔多，兼且6月中就要向豐德麗（571）提交償還15億元債務的建議，當中涉及大量發行新股，現有股東權益勢被大幅攤薄。
中國五礦表示不排除向東方有色（230）注資，消息刺激東方有色勁升23.4%。五礦亦持有東方鑫源（1208），既然可以向東方有色注資，五礦冇理由咁偏心，唔向東方鑫源注資，所以炒家跟手炒埋東方鑫源，股價全日升7.3%。
吉利汽車（175）停牌，傳聞向大股東增購兩間合營汽車公司權益。管理層早前已表明，不排除最終會收購大股東所才有汽車資產，問題是吉利汽車幾時有足夠資金進行收購而已。吉利停牌前報0.70元。
佑威（627）配完股證後，股價持續被炒高，噚日再升4.7%至0.335元。黑客話，佑威唔係乾炒咁簡單，聽講旗下納米科技業務愈做愈好，或有分拆概念。
阿虎