飛哥噚日喺立法會爆咗幾個人物出嚟，一個係相識多年嘅國內不一般嘅朋友，一個係自稱前中方官員嘅陳先生，重有多位喺聽到佢唔做好開心嘅朋友，個個八方都好有興趣知道係乜水，不過，飛哥就講明佢一定唔會講名，所以幕後黑手重未揪到出嚟。
於是有人猜帶佢上京見老江個位係李儲文，有人又話唔似，至於姓陳教授中國就有好多，分分鐘祖國聽日搵到佢出嚟同阿飛對嘴。
點都好，飛哥講得好清楚，中方人士多次搵佢傾，因為佢哋好緊張九月選舉，怕民主派贏，所以分分鐘係辦事人自把自為，完全係因為聽到上頭話要「搞掂佢」呢句指示。
的而且確，中方今次傾全力同民主派決一死戰，親中團體已經收到指示，要盡做，搞掂佢。至於點樣去演繹，付諸行動，就各師各法。
又阿飛始終係個性情中人，佢今次成個人豁晒出去，冇有怕，不過，佢同八方講，有啲擔心商台冇咗佢、大班同埋毓民，收聽率唔知保唔保得住。
傳真︰2623-9278
電郵︰