雲達不來梅班球員就獎金問題重未同會方傾掂數，真係令人擔心會影響佢哋喺禮拜六場德國盃決賽對亞琛嘅表現。
不來梅球員要求一分兩千歐元（約一萬九千港元），𠵱家佢哋喺德甲攞咗七十四分，咁即係話每人有十四萬八千歐元（約一百四十萬港元）獎金落袋；點知不來梅就以冇錢為理由，將個價減到一千至千五歐元。隊長包文就咁話：「我哋攞咗聯賽冠軍，又入咗下屆歐冠盃同打入今屆德國盃決賽，會方好應該大破慳囊。」
我求大俠都好認同包文所講，不來梅𠵱家入咗下屆歐冠盃分組賽，穩執二千萬歐元（約一億九千萬港元），家陣少少錢都唔肯畀，真係有啲那個。佢哋𠵱家力爭成為德甲同德國盃雙料冠軍，因為咁而影響球員士氣，搞到臨場踢唔出水準而輸畀亞琛，咁就唔係幾好啦！
德國新晉左閘拿姆今屆喺史特加打得咁好，佢嘅外借期係兩年，所以好多人認為拜仁會喺今夏收番佢頂離隊嘅李沙拉素，但係拜仁居然冇咁做，畀佢喺史特加留多一季。拜仁肯咁做，係因佢哋已撬咗史特加教練馬加夫，費事去得咁盡。拜仁話晒係大球會，有風度係應該嘅！
曼聯嘅荷蘭前鋒雲尼斯達羅近排唔知食錯啲乜，繼日前狂插阿仙奴領隊雲格冇風度同曼聯隊友基斯坦奴成日插水後，噚日又笑荷蘭國家隊隊友洛賓儍仔，寧願去車路士都唔嚟曼聯。我求大俠知道雲佬會喺歐洲國家盃之後會結婚，唔知佢係咪因為心情緊張，搞到自己四圍鬧人呢？
有消息話車路士會喺今日委任波圖教頭摩連奴為新教練，如果屬實，最開心嗰個一定係雲尼亞里。雲尼亞里前日同車仔班主阿巴莫域治同高層簡安食完晏後，重係唔知留任定俾人炒。雲尼亞里話過如果車仔唔要佢就快啲，等佢可以有時間搵新老細，睇嚟佢就快恨到咯。
今年嘅NBA新人遴選攪珠將喺今日揭盅，包尾魚腩隊魔術有最大機會攞到第一選。不過今年嘅新人質素同上年比就差得遠囉！無乜邊個話鶴立雞群，所以就算咁好彩攞到第一選，都要揀餐死，想執件好嘢，考眼光之餘重要靠啲運氣，唔同上年咁，諗到唔使諗就揀勒邦占士。