賣地成績超理想，挽回唔少買家信心。中原分行經理李書輝話，好似大埔區咁，月中有名買家用一百六十一萬買咗個寶湖花園，A座中層六百七十四呎單位。佢原本就諗住用嚟換樓，之後見個市咁靜，自己愈諗愈淡，十五十六想撻定唔要。
不過，前日賣地成績好，地產界個個都話前途一片光明，呢名買家嘅諗法，即時一百八十度扭轉，追隨番大市，最終都冇撻定。
蘭西記得，賣地之前，啲發展商又減價，又話個市係時候要回一回氣，搞到啲買家失晒信心，市場出現唔少撻定個案，賠咗定之後，𠵱家又一致唱好，小業主真係無所適從，今次寶湖花園嘅買家，唔知係叫醒目呢，定係好運呢？
賣地後樓市氣氛係咪轉好，見仁見智，不過發展商就趁勢部署賣樓。百利大嘅山頂豪宅寶雲山，幾經波折，終於喺債權銀行手上奪回，攞出嚟賣。
百利大新近委託中原代售呢個豪宅，首先推出東翼五樓兩個單位，分別二千七百二十呎，同埋二千八百九十二呎，設有露台。有見近排豪宅持續高價有承接，意向呎價由早前一萬五千，提高至𠵱家嘅一萬八千蚊。
呢個豪宅盤，當初曾一度落入債權銀行中銀手上，其後百利大向法院申請禁制令，禁止銀行出售物業。經過連場交鋒，百利大最終爭回項目出售。該盤早前曾有投資者出價十三億洽購，但未能打動其芳心。
政府拍賣馬鞍山地皮，前日以理想價成交，同區二手市場即刻生猛番哂，噚日雖然係假期，區內代理把握久未出現嘅良好時機，落力搵客。代理除喺分行貼晒唱好樓市嘅橫額，同埋有關賣地嘅報道之外，重主動出擊。
蘭西噚日喺馬鞍山廣場地下對出嘅行人路，見到中原擺咗兩個好簡陋嘅臨時地產代理站，其中一個重得塊紙板，貼咗啲放盤單位資料，加上幾個職員喺附近派吓傳單。
呢啲情況喺新盤開賣嘅時候就見得多，可以方便代理撈客，𠵱家連二手都用埋呢招，重揀喺個巴士站附近咁做，貪人來人往，睇嚟中原今次確實係有晒部署，迎接賣地後嘅入市潮。
內地自由行客，成為本港新貴，零售商都要各出奇謀招徠。
蘭西聽業內人士講，中環名店，𠵱家都變成內地客掃貨場。其中一間L字頭嘅手袋名店，以前多係日本客與香港有錢一族，排晒隊爭住買，𠵱家一樣有人龍，但係買家就變成內地客。真係風水輪流轉。
蘭西
電郵地址：