楊寶玲（Pauline）同美國拉斯維加斯賭場高層NelsonWong○二年喺拉斯維加斯舉行婚禮，當時有消息指Nelson婚前已經喺當地買咗塊地築愛巢，兩公婆重決定喺美國定居㖭。
馮仁昭近排八到佢兩公婆有意返香港發展，佢哋上個月重以九百七十萬喺寶珊道買咗一個面積約一千五百呎、三房兩廳嘅單位，該單位嘅舊業主日前已經遷出，所以Pauline都開始搞裝修嘅嘢，重不時派個細佬去安排一切。
根據田土廳嘅資料顯示，Pauline同老公Nelson買呢個豪宅嘅成交價約九百七十萬，佢哋可能係睇見地產巿道復甦，如果個單位買嚟自住嘅話，佢哋呢個價都算幾抵，因為有地產朋友同馮仁昭講呢個單位最高價時都要過千萬㗎，佢哋咁爽手買呢個單位都算有眼光。
演藝人協會聽日即將舉行籌款晚會，大會邀請咗潘廸華、許志安、梁漢文同吳國敬做表演嘉賓，賭王何鴻燊重會同女兒何超瓊一齊跳舞，波爾表已經一早買咗三張每張價值五萬蚊嘅枱，但就將兩張枱捐番出嚟，佢哋重送咗好多靚表出嚟拍賣㖭。
杜德偉（Alex）同佢嘅名模女友周汶錡甩咗拖冇幾耐，但話咁快佢日前就俾台灣報紙影到同一個面容清秀、身材嬌小嘅女仔着住情侶裝，喺台灣忠孝東路行街購物，兩人重不時咬耳仔，而Alex重好體貼咁幫個女仔拎戰利品㖭，不過當Alex發現被人影相，即刻情緒激動咁講：「唔好影，佢唔係藝人，只係我朋友嘅妹妹，得閒先一齊行街。」之後就即刻帶個女仔離去。
混血女模AnaR.前晚去咗太古廣場為《Elle》雜誌活動示範時裝，佢話將會同男友周立璟往東南亞旅行，佢甜絲絲咁話：「我哋拍咗拖兩年，我發覺去旅行真係一對情侶維繫感情嘅最佳方法。」
資深男藝人、香港電台教育部前總監殷巧兒老公羅國維，日前淋巴腺癌病逝，下月六號會喺香港殯儀館設靈，羅國維生前曾同鄭裕玲（嘟嘟）合作主演電視劇《呂四娘》，嘟嘟噚日喺電話度話：「我哋以前合作得好開心，𠵱家希望殷巧兒可以節哀順變。」而郭峰噚日喺將軍澳電視廣播城度就話：「佢份人好開朗，帶咗好多歡樂畀人。」
無綫呢排屢傳裁員，馮仁昭噚日收到自稱無綫員工嘅讀者投訴，佢指無綫各部門即將大裁員，重會裁走約八百名員工，製作部員工最受影響，無綫外事部助理總監曾醒明噚日喺電話回應：「我可以斷然否認無綫裁員，有記者重問我係咪今日又裁員，但今日係佛誕公眾假期，無綫人事部同事都休息啦。」
王家衞執導嘅電影《2046》，喺第五十七屆康城影展度空手而回，多份國際雜誌嘅影評都有唔同睇法。其中《時代》周刊嘅影評大讚王家衞係全世界最浪漫嘅電影人，重話《2046》攞唔到獎，真係戥呢套成個影展嘅最佳作品唔抵。不過電影雜誌《HollywoodReporter》嘅影評就話套戲雷聲大雨點小，令人徹底失望。
