賣地成績理想，令唔少人對6月份大市表現有所憧憬，除咗多隻新股相繼出籠外，唔少原先想做嘢嘅二三線股亦蠢蠢欲動。
先科國際（724）在早排淡市中，逆市搞批股。據講有人近期頻頻與證券界人士會面，力言隻股並非玩短線，唔會將股價炒高散貨就算數，而係有心長做。
如果大家唔善忘嘅話，應該記得先科未改前叫千禧智慧，業務係生產打火機，在股權易手後，曾發行新股收購一項生產高檔次電子零件同組件嘅業務，據有關人等講，先科家陣嘅賣點就係呢檔生意。
先科喺5月頭改名，然後在月中大市跌得最急時，搞咗一次先舊後新配股，每股1.13元，集資2260萬元。經紀陳話呢批貨已經盡落大戶之手，所以先科股價一直咁硬淨。
先科周二收市價1.22元，升3.39%，但成交唔大，只得78.6萬股，金額94.2萬元。雖然係咁，但有關人等堅稱會以宜進利（304）作為目標，終有一天會被人睇起。
慕容小初