朝早8點，潮界線人鬍鬚弟來電，原來潮界又有大事告急；紐約「拾篇」專門店上個禮拜火燭，店內存貨無情地全被燒清光，火源由貨倉蔓延到舖面，要關門裝修先至可以再營業。鬍鬚弟詳細解釋「拾篇」點解會火燭：「佢哋紐約間舖喺LafayetteStreet，鄰近小意大利同唐人街嗰頭，嗰頭雖然屬於潮爆區，但建築物比較舊，水力或電力系統點都差啲，唔多唔少會影響到消防系統。火燭當日，舖頭裏面個灑水系統聽講唔Work，咁就眼巴巴睇住成間舖燒晒！至於起火原因，聽講係班Sales入倉後煲煙，唔小心留下火種引起，所以啲火就由倉燒番出舖面喇！雖然燒晒批貨同燒埋間舖，但冇人受傷總算好彩，咪當火燒旺地囉！」鬍鬚弟彷彿知道晒事情來龍去脈，莫非當日喺火災現場？鬍鬚弟非常冷靜地答：「我平時多數去代官山間『拾篇』，好少去Lafayette嗰間。只不過我有個唔係咁熟、平時冇乜兩句嘅水貨Friend話我聽。我有紐約『拾篇』個電話喺度，你打去問吓咪一清二楚囉，電話係1-212-966-7799。」我喺當地時間下午三點打去，但響咗好耐都冇人聽電話，睇來鬍鬚弟所講屬實咯！
主持人：大食Jack
八卦熱報：