賣地成績理想，受惠者除咗業主外，重有過水濕腳嘅物業代理。美聯（1200）首季佣金收入不俗，周二股價已急升11.2%至1.79元。據聞有歐資行好快會將美聯投資評級調高，而主席黃建業亦重新增持股份，雖然現價已由近期低位1.29元反彈39%，但睇嚟重有得去。
冠中地產（193）持有66%世紀21地產，有消息公司諗住大事擴張地產代理業務，而且唔排除會分拆上市。冠中雖有炒賣概念，可惜股份成交太疏，買賣困難，好難吸引人留意。
建滔（148）、東方海外（316）、嘉里（683）、鞍鋼（347）、安徽海螺（914）、比亞迪（1211）、越投（123）、馬鋼（323）、人保（2328）、深高速（548）、北京燕化（325）及魏橋（2698）在5月28日後就會被納入大摩指數內，除咗燕化之外，其他股份短線可看高一線，因為沙地阿拉伯雖講明會增加石油產量，但對沖基金一於好少理，繼續將期油炒高，重上40美元水平。雖然對沖基金遲早會食胡令油價回落，但短期內化工股仍受油價高企困擾。
通達（698）周二突然急升5.9%至0.27元，成交更大增至1106萬元，絕對唔係乾升。黑客話，聽講此股獲芬佬垂青。通達主要從事產銷電子元件及零件，03年盈利5868.8萬元，勁升155%，每股賺1.94仙，末期息0.4仙，以工業股來說，通達PE14倍，息率2.22%，根本唔算吸引，阿虎唔明白點解芬佬會吼佢，除非通達往後每年盈利仍可以倍計增長。
阿虎