中華基督教青年會（YMCA）喺今年二月做咗一項「賭博以外，生命所在」調查，訪問一千一百名青少年，發現33%受訪青少年在過去三個月曾參與賭博，以打麻將、啤牌及賭波最多，第一次接觸賭博年齡為十二歲。YMCA提醒家長要以身作則，提供一個無賭博嘅家庭環境。
睇完呢段新聞，發覺自己嘅大家庭好唔符合YMCA嘅標準，自己細細個就幫老竇喺旺角花園街買字花、買外圍馬，跟佢學打天九、牌九。到咗自己有細路，唔得閒理，請阿婆湊孫，阿婆就教佢哋打天九：「嗱，六點加三點就係九點，呢隻牌叫做武九；五點加三點就係武八……」於是乎，佢哋未入讀小一，已經識晒天地人鵝，如果唔係自己堅持佢哋要考完會考先至可以打麻將，佢哋十三歲就已經識戥腳！至於鋤大D、廿一點咯喎，更加由細玩到大啦。
V小姐平時好打麻將，問佢屋企是否一個「無賭博家庭環境」，佢笑到身都震埋，原來佢位表姐鍾意與細路開玩笑，教佢哋考幼稚園面試：「嗱，先生問你鍾意乜嘢狗，你話天九；問你鍾意乜嘢顏色，你答清一色；問你鍾意食乜嘢，你話魚蝦蟹；問你行街鍾意買乜玩具，你話我買大，細佬買小。」有冇害親細路呀？冇噃，醒目仔女唔會笨，其中一個聰明女孩入咗著名女校，人家恨都恨唔到。呢位女孩子好鍾意玩魚蝦蟹，自行設計當做勞作，整咗一副好靚嘅魚蝦蟹出嚟，成班表姊表妹一齊玩！呢啲古仔講出嚟，真係罪過，好彩我哋唔係教徒，唔會俾上帝罰。