周二人人都話賣地成績好帶動港股反彈，但趙飛雲有個信佛嘅朋友則有唔同睇法，佢話當日運送佛指舍利的專機在1時半抵達香港，港股下午馬上轉弱為強。
如果佢嘅講法冇錯，咁就確係佛法無邊，因為當晚美股亦在冇特別原因下大升，杜指升159點，升幅1.6%，收報10117，納指更升2.2%，收報1964。
不過，噚日入馬場見到個老友就牙痛咁聲，原來佢在周二見賣地成績靚，追入恒指Call輪短炒，眼見周二晚美股大升，但港股噚日佛誕假期休市，變咗蜑家雞見水冇得飲，重要擔心美股周三晚回吐，今日會空歡喜一場。
杜指周二晚以大陽燭勁升，日線圖明顯看見20日線阻力在10124，周三晚可能會受阻，但由周線圖看，阻力則在10周線10249，可能反映杜指本周的真正阻力位其實在10250水平，亦是50日線水平。
相信美股昨晚只要靠穩，港股今日好大機會裂口高開，若能補回5月10日的下跌裂口11835頂部，則港股轉勢有望。
若港股今日高開後回試11700不破，可買入恒指Call輪9914短炒。以升破小形頭肩底頸線計，量度升幅可見12500。保守一些，現時50日線下降至12230水平，作為食胡位亦不俗。
周二買的新地（016），短線較大阻力位在68元，暫以10日線61元作為止蝕位，繼續收集。
滙控（005）近期走勢落後大市，但真正的升市點會冇滙控份，今日若升穿20日線112元，多買800股。
趙飛雲