每次出親庭都唔多肯合作兼花款多多嘅葛妮洛芙（CourtneyLove），前日為佢單藏毒案上庭應訊嘅時候，終於肯乖乖咁認罪，而且亦唔再亂咁講嘢，冇法啦，因為佢再唔合作，分分鐘要坐監㗎嘛。
已經成三十九歲嘅葛妮，前日着住條花裙去洛杉磯高等法院度應訊，雖然佢見到咁多記者，但係冇好似以前咁多動靜，而且冇接受佢哋訪問就入咗法庭。而喺法庭嘅十分鐘內，葛妮亦相當有秩序咁坐喺度，等法官問佢嘢先至出聲，好似法官問佢重申唔申辯，佢好簡單咁話：「認罪。」
其實葛妮之所以咁聽話，係因為佢事前已經同控方傾掂數，如果佢肯認罪就唔使坐監，只係緩刑守行為，而且控方重同意撤銷葛妮一項不守秩序行為嘅罪名㖭。法官叫葛妮七月十六日再上庭，聽吓正式嘅判決係點樣，不過檢控官已經講咗佢將會接受一個為期幾個月嘅戒毒復康計劃，其間佢要上堂、接受輔導同接受隨機毒品測試。如果葛妮最終唔能夠完成呢個計劃，或者違反咗其中嘅緩刑條款，佢就至少要踎番九十日監。
相信唔少人早排見到葛妮喺法庭或者表演嗰陣嘅癲喪行為，都以為佢已經儍咗，不過前日見到佢一面對切身利益就變番乖乖女，我羅拉就覺得佢唔知醒過幾多普通人㖭。