韓國手機一向予人印象總是聲靚畫面正，玩影相玩鈴聲的確無得頂，但係對於藍芽用家就只可以望機興歎，皆因一眾韓國機種都未有內置藍芽功能。而日前PANTECH就正式推出首部韓製藍芽手機G800，更率領兩部同門師兄弟G600及G900，部部都各有所長，至強勁、至輕巧、至大芒式式俱備，總有一部啱你口味！
記者：劉耀祥 攝影：周旭文
PANTECH於03年來勢洶洶，一部G500首創雙26萬色芒為手機規格寫出新一頁，不過今年各大韓機26萬色芒橫行，再出26萬色芒似乎新意欠奉，所以今次就推出首部韓製內置藍芽功能手機G800。藍芽之外亦擁有一貫韓機「傳統」，33萬像素相機加64和弦，唔單止可以影靚相聽靚聲，想用韓機配搭藍芽耳筒都冇問題，皆因隨機會有藍芽耳筒附送，認真抵玩！PANTECHG800雖然乃藍芽初哥，不過於操作上比起一眾藍芽大哥更加細心，於機側設有快速開關鍵，更為方便用家。
G800外形依然保持輕巧之勢，機側除設有藍芽鍵之外，亦設有影相快速鍵，用家可以毋須打開機身，用26萬色外芒一樣影到相。PANTECHG800不單止外芒用上26萬色，內芒亦一樣用上26萬色，128×160解像度影相畫面相當細膩，於室內光線較弱地方進行拍攝，效果亦都合乎要求，未會出現暗淡場面。G800六月頭就會開售，開價約$3,200，以同級價錢計認真全無敵手，除咗送藍芽耳筒之外，亦支援Java、MMS、GPRS及WAP等，啱晒多功能玩家。
制式：GSM900/1800/1900三頻
顯示器：（內）26萬色/128×160像素/TFT
（外）26萬色/128×128像素/TFT
鏡頭：33萬像素
功能：64和弦、藍芽、Java、GPRS、MMS、WAP
備用時間：200小時
通話時間：180分鐘
體積：86×46×22mm
重量：85g
G800主打多功能玩樂，而另一新機G600就大玩輕巧。
雖然市面上細細部又可以玩影相嘅手機多不勝數，但係再要有埋閃光燈就似乎難啲。而且G600輕巧細部之餘重要有內置閃光燈，影相有用之外，如果長時間開啟，重可以當埋小電筒使用，加上紅色機身搶眼之餘質感亦非常之好，相信女士睇見肯定愛不釋手。
機身規格亦依舊強勁，雙26萬色芒、33萬像素鏡頭、64和弦統統有齊。而影相功能亦與G800一樣，內外芒都可以影相，加上玩意亦相當多，就連快門聲音亦有微笑或真人發聲選擇，新機開賣價$2,700，買部返嚟𠱁吓女朋友，的確唔錯。
制式：GSM900/1800/1900三頻
顯示器：（內）26萬色/128×143像素/TFT
（外）26萬色/96×64像素/TFT
鏡頭：33萬像素
功能：64和弦、Java、GPRS、MMS、WAP
備用時間：200小時
通話時間：180分鐘
體積：80×40×21mm
重量：80g
PANTECH新機大晒冷除G600及G800外，重有部G900，今次就Sell個高解像外芒，面積約1吋大卻有128×160解像度，如此靚芒睇來電大頭相已經綽綽有餘，用嚟影相亦都表現出色，即時加相框都可以清楚顯示，直情好似用緊內芒影相一樣。機背設有33萬像素鏡頭，不過位置就比較尷尬，45度角向上稍為有點不便。而其他功能就與前兩部一樣，Java、MMS、GPRS及WAP一應俱全。而聲效亦都係「標準裝備」64和弦，不過機身有一個喇叭，音量略為不足。
制式：GSM900/1800雙頻
顯示器：（內）26萬色/128×160像素/TFT
（外）26萬色/128×160像素/TFT
鏡頭：33萬像素
功能：64和弦、Java、GPRS、MMS、WAP
備用時間：200小時
通話時間：180分鐘
體積：87.3×46.5×22mm
重量：90g
雖然韓國藍芽手機乃初次登場，不過市面上有藍芽又有得影相嘅手機多不勝數，摺機直身機一應俱全，想要乜款都得。
（a）MoshiMoshi（26289090）
（b）全新世界（27872282）
