港股上周一創出今次調整低位10917後，跟住的6個交易日，升咗5日，假前上到11700，由低位起計，已升番783點，相信會唞一唞氣，等結算過後，再向高位推進。
國企假前個別發展，好多中型熱門股都回落，但兩大石油股同中國人壽（2628）有好表現，令國指仍有26點進帳。國企由低位大幅反彈，調整一下，好正常。好似中國鋁業（2600），假前就見到幾家大行輪流咁沽，但低位亦見到有大盤係咁接，撼得好激烈。
中鋁剛宣布在巴西成立合營，生產氧化鋁，首期投資10億美元，年產能力180萬噸，預期07年投產，而最終投資達40億美元，年產能達720萬噸；可能有大行憂慮中鋁會再集資，唔排除沽壓由此而來。不過，合營計劃十畫只得一撇，最快都要明年始落實，短期唔會有龐大資金需求。中鋁04年預測每股賺0.56元人民幣，PE只係8倍，低於國際同業好多。
同中資人士傾開，傾傾吓收到啲新料，就係北京中信已部署好，未來一兩年會有連串大動作，而香港幾家直屬該系統嘅上市公司，唔多唔少都會受惠，特別係已塑造為北京中信電訊旗艦角色的中信21世紀（241），更要留意。
北京中信資產逾5000億元人民幣，涉及行業40多個，在成為21世紀主要股東1年多後，去年8月正式進行注資，將鴻聯九五的45%注入，作價3600萬元人民幣，以21世紀的上海物業項目交換。
鴻聯九五係內地第5大手機短訊（SMS）供應商，在語音應答系統服務（IVRS）更擁有最大的市場份額，去年上半年獲利800萬元人民幣，以收購價計，PE不足5倍，好明顯係「明益」嘅行動。今年2月，公司斥資320萬元人民幣，增持鴻聯九五權益至49%。
北京中信既要做好戲，相信明益行動陸續有來，21世紀會不斷壯大。中國市場電訊增值服務發展迅速，鴻聯九五盈利會倍計增長。21世紀未來收購的業務，「級數」應會更高，「晒士」亦更大，日後盈利以幾何級數上升，股價亦會相應翻一番，甚至翻幾番。有中信不斷支持，21世紀好大機會成為「明日之星」，中長線值得持有。
郭兆誠