大市噚日似玩過山車，恒指早段淡靜，在11620水平徘徊，但中午收市前突然急挫至11512。
投資者下午睇賣地睇到目定口呆，曾有一段時間買賣兩閒，大市好似唔識郁，差不多要等兩幅地皮都以超高價售出後，地產股才識得反應，港股最後收11692，升29點。
講番賣地結果，兩幅地皮都以高出底價70--80%成交，成績可謂好到不得了。賣地期間，重出現舉手舉到有人拍手掌歡呼，都算罕見。
兩幅地皮合共為政府帶來近30億元收入，較市場預期上限21億元多9億元。不過，財爺話賣地成績理想，唔可以解決財赤問題。
樓市前景肯定唔錯，但港股後市則唔易估，據聞噚日大戶繼續開6月淡倉，準備要食大茶飯。如果後市因為賣地成績理想而被抽高，唔排除大戶會趁高沽空。
平安保險開始推介，保薦人及包銷商陣容鼎盛，有大摩、高盛同中銀，相信上市後表現唔會太差，喺佢上市前，相關股份估計亦有一輪炒作。噚日人保財險（2328）炒上4.5%，收2.925元，中國人壽（2628）亦升2.3%，收4.375元。
Cookie話，現時港股表現陰陽怪氣，樓市雖然看好，但地產股未必值得投資，投資者再將焦點轉移至新股，資金暫時會留在香港，唔會進一步流出。
除咗平安保險外，中海集運同蒙牛都是投資者的主要目標，新股浪潮或會為國企股帶來新一輪炒風，國企蟹民可能有止蝕和鬆綁的機會。
阿虎