滙豐控股昨日在港舉行「非正式」股東大會（正式嘅喺倫敦開）。獅子銀行在港多忠實擁躉，係人皆知，佢哋班小股東，睇怕亦係本港上市公司中，最有sense嘅小股東。
噚日好多提問嘅伯伯嬸嬸，一開腔就用英文發問，問題有板有眼，同記者提問嘅範圍相去不遠，例如壞帳撥備、加息影響、派息政策等等，甚至連環保同社會責任都唔放過，有股東問滙豐政策會否貸款畀煙草公司，絕對唔係糾纏於股東會茶點好唔好食嘅小股東可比。
去過滙豐股東會，就知香港卧虎藏龍。有位仍然手持一張張股票嘅伯伯，問管理層可唔可以為佢度身訂做，合併幾張大額面值股票，原來四年前滙豐將每張一手四百股嘅股票，改為每張一萬股，佢都覺得「細」，希望一張過五萬股，講完重揚起手中一叠五張股票，現場即時起哄，搞到行政總裁葛霖都笑。以現時滙豐股價一百一十一蚊計，佢老人家係咁易fing一fing，就五百幾萬。
（圖）股東伯伯話嫌每張一萬股嘅股票面值太「細」，艾爾敦（左）同葛霖（右）聽到都忍唔住笑。
傳真︰2623-9278
電郵︰